МАХН-аас “Өрх бүрт орон сууц” хөтөлбөртэй холбоотой мэдээллийг өнөөдөр хийлээ. Уг хөтөлбөрийн бүртгэлийн хугацаанд нийт 30 орчим мянган иргэн бүртгүүлжээ. Харин хөтөлбөрийг УИХ-д суудалгүй МАХН дангаараа хэрэгжүүлэх бус, эрх баригчид хамтран хэрэгжүүлэх ёстой гэж үзэв. Түүнчлэн Монгол Улсын Ерөнхийлөгч, Ерөнхий сайд нарт хамтран ажиллах санал хүргүүлсэн байна.

МАХН-ын дэд дарга Б.Тулга: “Сонгуулийн үеэр АН надад хандаж ард түмний өрийг тэглэх тал дээр анхаарч, санаачилгатай ажиллаарай гэдэг үүрэг өгсөн. Энэ үүргийг би мартаагүй, биелүүлнэ. Миний тооцоолсноор оффшор бүсэд байгаа хөрөнгийг Авилгатай тэмцэх газар, прокурортой хамтраад оруулж ирэх, хоёрдугаарт, өдөр, шөнөгүй урд хөрш рүү байгалийн баялгаа гаргаж байгаа мөнгө нь орж ирэхгүй байгаад анхаарч, орлого нэмэгдүүлэх, гуравдугаарт, газрын доорх баялаг ард түмнийх мөн учир энэ баялгийг Үндсэн хуульд заасны дагуу иргэддээ хуваарилах юм бол иргэд өр, зээлээсээ гарах бүрэн боломжтой. Энэ талын хуулийн төслийг өргөн барихаар УИХ дахь АН-ын гишүүд ажиллаж байгаа. Удахгүй УИХ-д өргөн барина” гэсэн утга санаа бүхий үг хэлснээс хойш багагүй хугацаа өнгөрлөө. Тийм учир танд хандан иргэддээ өгсөн амлалтаа хэрэгжүүлэх талаар санаачилга гаргахыг санал болгож, дэмжин хамтран ажиллахад бэлэн байгаагаа идэрхийлж байна. Иргэдийн зээл, зээлийн хүү өдөр бүр нэмэгдсээр уул овоо мэт дааж давшгүй дарамт болон нэмэгдэж байгааг тооцон та бидний энэ саналын хариуг долоо хоногийн дотор өгөхийг хүсье.

Иймд "Ерөнхийлөгч Х.Баттулга та төрийн тэргүүн, Үндэсний аюулгүй байдлын тэргүүний хувьд хууль санаачлах эрхээ эдлэн

• Ипотекийн найман хувийн зээлийн хүүг тэглэх,
• Одоо ипотекийн зээлтэй байгаа иргэдийн зээлийн хүүг тэглэж, хүүнд төлсөн мөнгийг үндсэн төлбөрт тооцох,
• Цалингийн зээлийн хүүг тэглэх,
• Тэтгэврийн зээлийн хүүг тэглэх
• Эдгээр тэглэсэн зээл, зээлийн хүүгийн төлбөрийг нэгтгэн тооцож, төр засгаас арилжааны банкуудад нэг удаа нөхөн төлбөр олгох зэрэг зүйл заалтыг багтаасан хуулийн төсөл санаачилж, өргөн барихыг хүсч байна” гэв.

Харин Ерөнхий сайд У.Хүрэлсүхэд хандан:

• Орон сууцанд орохдоо урьдчилгаа 30 хувь төлдөг байдлыг болиулах,
• Үндсэн төлбөрөөс нь түрүүлж хүү бодож авдгийг зогсоох,
• Орон сууцны зээлийг иргэдэд 40 жилийн хугацаанд хүүгүйгээр эзэмшүүлэх гэх мэт зохицуулалт хийхийг зөвлөж байна. Гадаадын олон оронд яг ийм зарчим хэрэгжүүлж, үр дүнд хүрсэн байдаг. Манайд ч боломжтой гэж тэд үзэж байна.

МАХН-ын Ерөнхий нарийн бичгийн дарга Э.Эрдэнэжамъян: Энэхүү хөтөлбөр Үндсэн хуулийн 16.1-д заасан хүний амьд явах эрхийг хангахтай шууд холбоотой. МАХН-ын хувьд иргэдийн амьдрах эрхийг төр засгийн нийгмийн чиг баримжаатай бодлого, үйл ажиллагааны дагуу найдвартай хангах чиглэлийг баримталж, ийм зорилгыг дэвшүүлдэг нам бөгөөд МАН бидэнтэй түүх нэгтэй намын хувьд ийнхүү хандаж байна. МАХН-ын “Өрх бүрт орон сууц” хөтөлбөрийг санаачлагч нь мөн боловч энэхүү асуудлыг дангаараа өмчлөхөөс татгалзаж, уг хөтөлбөрийг хамтран хэрэгжүүлэх хүсэл эрмэлзэлтэй улс төрийн намууд, ялангуяа МАН-тай хамтран хэрэгжүүлэх саналтай байгаагаа албан ёсоор мэдэгдэж байна” гэв.