Хэнтий аймгийн Баян-Овоо сумын цагдаагийн хэлтэст өчигдөр 09.30 цагт “Дөрвөн хүүхэд нууранд живлээ” гэсэн дуудлагын дагуу тус сумын хэсгийн төлөөлөгч, цагдаагийн дэслэгч Н.Раднаабазар, хэсгийн цагдаа, цагдаагийн дэд ахлагч Э.Мөнхтуяарах-Од нар 09.40 цагт Гүрмийн нуурны зүүн талд шуурхай очиход дөрвөн хүүхэд нуурын эргээс холдон хийлдэг гудас дээр хөвж явсан байна.

Цагдаагийн алба хаагчид автомашины дугуйны олгой хаммерыг хийлж, усны хантааз өмсөн Баян-Овоо сумын дөрөвдүгээр багийн Засаг дарга С.Отгонбаярын хамт нуур луу сэлж орон 5-8 насны дөрвөн хүүхдийг уснаас эсэн мэнд гаргажээ.

Хэнтий аймгийн Дэлгэрхаан сумын нутагт орших Аварга тосон рашаан сувиллын газар энэ жил нуураа цэвэрлэх зорилгоор үйл ажиллагаагаа түр зогсоосонтой холбоотойгоор иргэд аялагчид Баян-Овоо сумын нутагт орших Гүрмийн нуурыг зорих болжээ.Тус нуур нь 30 метр гүн, 20 км радиустай нуур юм.

Нийт нутгаар усархаг бороо орж буйгаас гол, нуур, цөөрмийн түвшин дээшилсэн энэ үед ард иргэд амралт, аялал зугаалгаар явахдаа бага насны хүүхдүүдийг гол, нуур, цөөрмийн орчимд тоглуулахгүй, хийлдэг завь, гудас ашиглуулахгүй байх, хараа хяналтгүй орхихгүй байхыг Цагдаагийн ерөнхий газраас сэрэмжлүүлж байна.