Европын мөнгөн дэвсгэрт 23 жилийн дараа анх удаа шинэ загвартай болох нь. Европын төв банкны тэргүүн Кристин Лагард "Шинээр хэвлэгдэх дэвсгэртүүд дээр алдар суутнууд, соёлын дурсгалууд, онгон байгалийн төлөөллүүд зэрэг Европыг улам хүчирхэг болгодог нийтлэг онцлог, олон янз байдлыг харуулах болно” гэж мэдэгджээ.

Мөнгөн тэмдэгтийг хуурамчаар үйлдэхтэй тэмцэх ажлын хүрээнд өнгө төрхийг нь тогтмол шинэчлэх шаардлагатай байдаг. Энэ хүрээнд Европын 20 орны нэгдсэн мөнгөн тэмдэгт евро дэвсгэртүүдийг шинэчлэх ажлыг Европын Төв банк 2021 оноос эхлүүлжээ.

Европын төв банк шинэ дэвсгэртүүдийн загварыг шалгаруулах шүүгчдийн бүрэлдэхүүнийг удахгүй тодруулж, энэ онд багтан загвар зохиогчдын дунд уралдаан зарлах аж.

Ирэх 2026 онд шилэгдсэн бүтээлүүдийг нийтэд толилуулж, Европын иргэдээс санал хураасны дараа шинэ мөнгөн дэвсгэртүүдийн харагдах байдлыг эцэслэж шийдэх юм байна. Шинэ дэвсгэртүүд гүйлгээнд гарч эхлэх хугацаа тодорхойгүй байгаа аж.

Европын төв банк байгаль орчинд учрах хохирлыг багасгах хүрээнд шинэ дэвсгэртүүдийн хэрэглээний хугацааг аль болох урт байлгахаар эрмэлзэж байгаа юм байна.

Эх сурвалж: DW, NOVYNY
Б.ЖАРГАЛ