Засгийн газрын Бүрэн Эрхт Төлөөлөгч Ж.Батзандан өнөөдөр (2025.02.20) стратегийн ач холбогдолтой ордуудын төрийн эзэмшлийн хувь хэмжээг тогтоох хэлэлцээр хийх талаар мэдээллээ.

Тэрбээр мэдээллийнхээ үеэр "Орд болгоны ард нэг сайд, гурван УИХ-ын гишүүн байна. Хөшөөтийн уурхайг хэдэн олигарх гэр бүл аваад, 10 жижиглэж хуваагаад, нөөцийг нь дараад бүртгүүлчихсэн байна.

АМГТГ-ын дарга асан Д.Жаргалсайхан "Ухаа худаг", "Халзан бүрэгтэй", "Бороо гоулд" зэрэг улсын төсвөөр хайгуул хийсэн бүх стратегийн ордыг авлига, албан тушаалын замаар компаниудад олгосон. Одоо Д.Жаргалсайхан гурван стратегийн ордын далд эзний үүрэг гүйцэтгэж байна.

Ж.Оджаргал гуай, танаас өөр хүн, танайхаас өөр компани Монголд байдаг шүү. Монголын хуулийг уландаа гишгэж, ард түмнийг доромжилж байгаа бол лицензийг нь хүчингүй болгоод, дараагийн монгол компаниудад нь шууд өгөх хэрэгтэй.

Намайг стратегийн ордуудад нүүрлэсэн хулгайтай тэмц гэж БЭТ-өөр томилсон. Би ажил авсан бол тултал нь хийдэг. Намайг БЭТ-өөр тавьчихлаа гэж муу хэлж байгааг харж байгаа биз. Тийм байх аа. Та нартай хэлцэл хийх, хулгайч нартай тохирох хүн тавигдахыг хүлээж байсан байх. Тийм юм байхгүй.

Нүүрс ухаад Хятад руу зарж чадах монгол аавын хүүхдүүд 1000, 1000-аараа байна. Нарийнсухайтыг 1995 онд Уул уурхайн сайд Р.Жигжид гэж хүн Б.Нямтайширт өгсөн. Б.Нямтайшир гуай энэ ордыг 2005 онд гадаадын банканд тавиад 500 сая ам.доллар зээлсэн.

Гайхалтай хөдөлмөрч гэх шиг. Худлаа юмаа боль. "МАК"-ын ордууд Н.Номтойбаяр, Н.Цэлмүүн хоёр дээр л байдаг. Энэ хоёр хүнийг баян болгох гэж монголчууд төрөөгүй" гэв.

Б.ЖАРГАЛ