Вьетнам улсын томоохон хотуудад коронавирусийн халдварын /Ковид-19/ NB.1.8.1 хувилбарын тохиолдол нэмэгдэж байгаа ажээ.

Өнгөрсөн долоо хоногт буюу тавдугаар сарын 30-наас зургадугаар сарын 6-ны өдөр хүртэл Ханой хотод нийт 150 шинэ тохиолдол нэмэгдсэн талаар "Синьхуа" агентлаг мэдээлсэн байна.

Монгол Улсаас БНСВУ-д суугаа Элчин сайдын яамнаас тус улсад коронавирусийн халдвар нэмэгдэж байгаатай холбоотойгоор сэрэмжлүүлэг гаргажээ.

Тус сэрэмжлүүлэгт "2025 оны тавдугаар сараас эхлэн Ковид-19 халдварын дэгдэлт аажмаар ихсэж байгаа бөгөөд Вьетнамын Эрүүл мэндийн яамнаас олон нийтийн газраар явахдаа болон нийтийн тээвэр, эрүүл мэндийн байгууллагаар үйлчлүүлэхдээ амны хаалт зүүх, шаардлагагүй бол олноор цуглахгүй байх.

Гарын ариун цэвэр сахих, дасгал хөдөлгөөн хийж шим тэжээлтэй хооллох, халуурах, ханиалгах, амьсгалахад хүндрэлтэй болох үед цаг алдалгүй өөрт ойр байгаа эрүүл мэндийн байгууллагад хандах зөвлөмжийг иргэд, олон нийтэд хүргүүлж эхэлсэн болно.

Иймд Вьетнам Улсад ажиллаж, амьдарч байгаа болон тус улсад түр хугацаагаар зорчиж байгаа иргэд Та бүхэн Ковид-19 халдвараас урьдчилан сэргийлэх арга хэмжээ авч, халдвар хамгааллын дэглэм баримталж, өөрийн эрүүл мэндээ хамгаалахыг хүсье" гэжээ.

Өнөөдрийн байдлаар тус улсад Ковид-19 халдварын улмаас хоёр хүн нас барсан байна.

Б.ЖАРГАЛ