АНУ-ын Ерөнхийлөгч Дональд Трамп БНХАУ-ын Ерөнхийлөгч Ши Жиньпинтэй уулзаж байгаа бөгөөд энэхүү ихээхэн хүлээлттэй дээд хэмжээний уулзалт нь дэлхийн хоёр их гүрний өрсөлдөөний дараагийн үе шатыг тодорхойлж магадгүй гэж үзэж байна.

Энэ нь Трампын 2017 оны айлчлалаас хойш АНУ-ын Ерөнхийлөгчийн Хятадад хийж буй анхны айлчлал бөгөөд Ойрх Дорнод дахь мөргөлдөөн, түүнээс үүдэлтэй дэлхийн эрчим хүчний хямралын улмаас эдийн засаг, геополитикийн тодорхойгүй байдал нэмэгдсэн цаг үед болж байна. Энэ нь ялангуяа Азийн орнуудад хүчтэй нөлөө үзүүлээд байгаа юм. Ши Жиньпин, Дональд Трамп нар хоёр өдрийн айлчлалын үеэр Ираны дайн, худалдаа, технологи, Тайвань зэрэг маргаантай олон асуудлыг хэлэлцэх төлөвтэй байна. Энэ уулзалтын эрсдэл, ач холбогдол Трампын хувьд илүү өндөр харагдаж байгаа бөгөөд тэрээр худалдааны асуудлаар буулт авах, мөн Ираны дайныг зогсооход Бээжингийн дэмжлэгийг авахыг зорьж байна.

Ингэснээрээ арваннэгдүгээр сард болох завсрын сонгуулийн өмнө Америкийн сонгогчдод тодорхой үр дүн харуулахыг хүсэж байгаа аж. Дэлхийн хамгийн чухал харилцаануудын нэгт тогтвортой байдал авчирна гэсэн хүлээлтийн дунд энэхүү уулзалт нь хоёр удирдагчийн ирээдүйн харилцаа, хамтын ажиллагааны өнгө аясыг тодорхойлох магадлалтай байна.