Төрийн байгуулалтын байнгын хороо хуралдаж хоёр асуудлыг хэлэлцэн шийдвэрлэлээ. Нэгдүгээрт, Сонгуулийн тухай хуульд өөрчлөлт оруулах асуудлыг хэлэлцэж дэмжлээ. Үндсэн хуулийн цэц 42 дугаар тойрогт нөхөн сонгууль явуулах тогтоол нь Үндсэн хуультай зөрчилдөж байна гэж үзсэн учраас үүнтэй холбогдуулан Сонгуулийн тухай хуульд өөрчлөлт оруулах шаардлагатай болсон юм.

Хоёрдугаарт, Төрийн албан хаагчийн төлөөллийг сонгон шалгаруулах журам батлах тухай тогтоолын төслийг хэлэлцэж дэмжсэн юм.

Мөн 38 гишүүний гарын үсэгтэй УИХ-ын даргыг огцруулах шаардлагыг Төрийн байгуулалтын байнгын хороонд шилжүүлж дүгнэлт гаргаж өгөхийг хүссэн. Төрийн байгуулалтын байнгын хорооны өнөөдрийн хуралдааны эхэнд гишүүд уг асуудлыг хэлэлцэх эсэхийг Байнгын хорооны дарга Д.Лүндээжанцангаас тодрууллаа. Харин Төрийн байгуулалтын байнгын хорооны дарга Д.Лүндээжанцан хэлэлцэх боломжгүй гэх хариултыг өглөө.

Тэрээр "УИХ-ын даргыг огцруулах ямар нэгэн тогтоол орж ирээгүй учраас энэ асуудлыг хэлэлцэх боломжгүй. УИХ-ын даргыг огцруулах хуулийн шаардлагын дагуу тогтоолын төсөл орж ирсэн бол хэлэлцэх байлаа. Харин энэ асуудлын тухайд намын бүлэг, нам дотроо хэлэлцэн шийдвэрлэх шаардлагатай. УИХ-ын үйл ажиллагаа өмнө нь олон удаа гацаж байсан. Тэр бүх тохиолдолд ойлголцол, зөвшилцлөөр асуудлыг шийдвэрлэж ирсэн. Тиймээс бүлэг дотроо яриад ойлголцох нь зөв" гэлээ.