Өмнөговь аймагт томуу, томуу төст өвчлөл газар авч, аймгийн БОЭТ-д хэвтэн эмчлүүлж байгаа эмчлүүлэгчдээс өнөөдрийн байдлаар нэг хүн нас барсан тохиодол гарсан байна. Мөн хүүхдийн тасагт хэвтэн эмчлүүлж байгаа хүүхдүүдийн хоёр нь маш хүнд, долоон хүүхэд хүнд байгаа бөгөөд өвчлөл даамжирч хатгалгаа, менингит, H1N1 вирусын халдвар авч байна гэлээ.

Хэвтэн эмчлүүлэгчдээс ХӨСҮТ-д 18 сорьц шинжилгээнд явуулснаас 10 хүний сорьц шинжилгээгээр томуугийн H1N1 вирус илэрсэн тул аймгийн хэмжээнд олон нийтийн арга хэмжээг зохион байгуулахыг хориглосон шийдвэрийг Онцгой комиссын хурлаас гаргажээ.

Ингэхдээ иргэдийг дараах зүйлсийг зайлшгүй анхаарах шаардлагатай гэдгийг онцолжээ.

•Амны хаалт /маск/ хэрэглэж хэвших

•Халуурсан, томуугийн шинж тэмдэг илэрсэн тохиолдолд яаралтай эмнэлэгт хандах

•Халуун аарц, буцалгаа, амин дэмээр баялаг хоол хүнс хэрэглэх

•Олон нийтийн газруудаар явахгүй байх

•Ажлын байрны болон гэрийн агааржуулалт, халдваргүйжүүлэлтэд онцгой анхаарах

•Ариутгалын бодис хэрэглэх зэрэгт анхаарч томуу, томуу төст өвчнөөс урьдчилан сэргийлэхийг Өмнөговь аймгийн Онцгой комиссоос анхааруулж байна.