Энэ сарын 22 буюу энэ долоо хоногийн баасан гаригт Нийслэлийн Иргэдийн Хурлын Төлөөлөгчдийн хуралдаанаар Хотын даргыг сонгох Тэргүүлэгчдийн хуралдааны товыг зарлаж магадгүй гэх мэдээлэл байна. Уг хуралдаанаар тодорхой хэд, хэдэн асуудлыг хэлэлцэж шийдвэрлэнэ.

Хэлэлцэх асуудлын жагсаалтын хамгийн сүүлд “БУСАД” гэж бичсэн нь Хотын даргыг сонгох хуралдааны товыг зарлах тухай байж магадгүй гэж НИТХ-ын төлөөлөгчид хэлж байна.

Хуралдааны товыг тогтоох, хэлэлцэх асуудлын жагсаалтыг батлах нь НИТХ-ын дарга С.Амарсайханы мэдлийнх учраас хэзээ хуралдах, ямар асуудал хэлэлцэх зэргийг тэр л товлож, тодорхой болгох аж.

Нөгөөтэйгүүр Хотын даргад хэн, хэн өрсөлдөх вэ гэх асуулт олон нийтийн анхаарлыг татаж байна. Өмнө нь Хотын даргын өрсөлдөөнд оролцож төлөөлөгчдийн олонхийн саналыг авсан ч Ерөнхий сайд У.Хүрэлсүхээс дэмжлэг авч чадаагүй С.Мөнхчулуун дахин нэрээ дэвшүүлнэ гэдгээ мэдэгдсэн. Түүнтэй хамт мөн өмнө нь Хотын даргын өрсөлдөөнд оролцоод олонхийн саналыг авч чадаагүй НИТХ-ын дарга С.Амарсайхан өрсөлдөнө гэж буй. Өөрөө ч амбиц ихтэй, хөөцөлдөлгөө сайтай байгаа гэх. Энэ бол Хотын даргын өрсөлдөөнд хэн нэр дэвших вэ гэх асуултад хариулж болох хамгийн боломжтой хувилбар.

Гэхдээ Ерөнхий сайд У.Хүрэлсүхийн талынхан С.Амарсайханыгаа ялалт байгуулна гэдэгт бүрэн итгэхгүй байгаа учраас ялагдах эрсдлээс сэрэмжилж түүний оронд нэр дэвших боломжтой өөр хувилбарыг хайж эхэлсэн гэх мэдээлэл байгаа юм. МАН-ын удирдлагууд С.Амарсайханыг нэр дэвшүүлэхгүй харин гаднаас намын Ерөнхий нарийн бичгийн дарга Д.Амарбаясгаланг эсвэл Хотын даргын орлогчийн ажлыг энэ цагт хийж гүйцэтгэж буй Ж.Батбаясгалан нарыг нэр дэвшүүлэх үү гэх асуудлыг ярилцсан гэх мэдээлэл байна.

Ж.Батбаясгалангийн хувьд хувь улс төрчийн туршлага нимгэн, нас залуу гэх шалтгаанаар нэр нь хасагдаж мэдэх бөгөөд Ерөнхий сайд У.Хүрэлсүх Д.Амарбаясгалан, С.Амарсайхан нараас аль нэгийг нь сонгож хотын даргад өрсөлдүүлж мэдэх нөхцөл байдал үүсээд буй аж. Одоо НИТХ-ын Тэргүүлэгчдийн хуралдаанаар төлөөлөгчдийн олонхийн саналыг авч Хотын даргад дэмжигдсэн хүнийг Ерөнхий сайд У.Хүрэлсүх ажлын тав хоногт багтаан шууд батламжлах ёстой, буцаах эрхгүй.

Тиймээс У.Хүрэлсүхийн талынхан маш сайн бодож, нөгөөтэйгүүр саналаа хайрцаглаж, гарцаагүй ялалт байгуулах нэгийгээ Хотын даргад нэр дэвшүүлэх бодит шаардлага үүссэн учраас нухацтай шийдвэр гаргах ёстой болж байна.