Ц.НЯМДОРЖ: НАМАЙГ АЖЛАА ӨГ ГЭЖ БАЙГАА НЬ ӨӨР ЗОРИЛГОТОЙ

Урьдчилан хорих 461 дүгээр ангид 48 цагийн хугацаагаар саатуулагдах үедээ амиа хорлосон гавьяат хуульч, шүүгч Л.Б –тэй Улсын прокурорт нэг конторт 10 жил хамт ажиллаж байснаа Хууль зүйн сайд Ц.Нямдорж ярив. Ингэхдээ өөрийнх нь хариуцсан салбарт олон нийтийг цочирдуулсан, ноцтой хэрэг гарсанд уучлал хүсээд талийгаачийн ар гэрийнхэнд эмгэнэл илэрхийлж болох байсан ч тэгсэнгүй. Тийм утга бүхий үгийг ч амнаасаа унагасангүй.

Харин эсрэгээрээ өөрийгөө өмгөөлж, хамгаалжээ.

Тэрбээр энэ талаар “Энэ асуудал хариуцлага алдсан эсэх дүгнэлтийг хууль хяналтынхан дүгнэлт гаргасан тохиолдолд тийм, тийм хүн хариуцлага алдсан гэдгийг нь тогтоож, хариуцлага тооцно гэж бодож байна. Хэн хариуцлага хүлээх ёстой нь тогтоогдоно. Харин намайг хариуцлага тооц гэж байгаа зүйл бол захиалгатай зүйл. Намайг ажлаа өг гэж байгаа бол шал өөр зорилготой, өөр асуудал хурц хэлбэрээр илэрч гарч ирж дугуй эргэчих гээд байгаа учраас тэрнээс өрсч, далимдуулж байгаа зүйлүүд бий” гэжээ.

Энэ үгээрээ уг хэрэгт намайг хамааруулан хариуцлага тооцохыг хүлээн зөвшөөрөхгүй гэсэн байна. Харин хорих ангийн дарга, камер хянагч нар л ажилгүй болж мэдэхээр хандлага түүний ярианаас ажиглагдлаа. Шударга үнэний туйл гэгддэг Хууль зүйн сайд Ц.Нямдорж өөрийн сайн дураар олон нийтийн өмнө гарч ирээд ингэж ярьсан ч юм биш. Харин Засгийн газрын хуралдааны үеэр сэтгүүлчид амдан тосч аваад хэргийн талаар амнаас нь ганц, хоёр үг унагасан нь энэ юм.

2014 онд Газрын тосны газрын дарга Д.Амарсайхан Урьдчилан хорих 461 дүгээр ангид хоригдож байхдаа мөн амиа алдсан. Хуулийн байгууллагын ажилтнууд хариуцлагагүй, ёс зүйгүй хандсан нь талийгаачийг үхэлд хүргэсэн байж болзошгүй нөхцөл байдал харагддаг. Сая болж өнгөрсөн хэргийн хувьд төрийн хамгаалалттай байранд камертай өрөөнд иргэн амиа хорлож байхад хорих ангийн ажилтнууд мэдээгүй нь дэндүү хариуцлагагүйнх. Гэтэл өнөөдөр хариуцлага хүлээх гол хүн нь өөрийгөө өмөөрөөд сууж байна. Нэгдүгээр сард Ц.Нямдоржийн харъяанд нь байдаг хилийн цэрэг зэвсэгтэй оргоод улмаар хил даваад осгож нас барсан байдаг. Талийгаач хүүгийн эцэг, эх өрөө өмрүүлэн хүүгээ санаж суугаагаа ярьжээ. Гэтэл Ц.Нямдорж сайд уг хэргийн талаар нам гүм, таг дуугүй. Цэрэг яагаад оргосон, Орос руу явсан нь ямар учир шалтгаантайг үнэн, зөвөөр тодруулахыг эцэг, эх нь эцсийн найдлагаа болгон хүлээн сууж байна.

Албан тушаал, эрх ямба тойрсон бужигнааны дундуур оройлон, манлайлж “ШУДАРГА ЁС” ярьдаг Хууль зүйн сайд Ц.Нямдорж энэ удаа шударга загнаж хариуцлагаа ХҮЛЭЭХ ёстой.

Албан тушаалыг авсан шигээ өгдгийг ноён нуруутай, шударга, үлгэр дуурайлал үзүүлдэг ахмад улс төрч гэж магтуулдаг манай зарим сайд нар харуулах ёстой.

ЭСРЭГЭЭРЭЭ СЭТГҮҮЛЧДЭЭС БУЛТАЖ “ЦЭРЭГ ЗОДДОГ ҮЗЭГДЭЛ БАЙХГҮЙ. БАРИМТТАЙ ЯРЬ" МЭТЭЭР МАРГАЛДСАН

Дорноговь аймгийн Зүүнбаян дахь Зэвсэгт хүчний 336 дугаар ангид алба хааж байсан хугацаат цэрэг нас барахад парламентын хамгийн ноён нуруутай гэгддэг Батлан хамгаалахын сайд Н.Энхболд найз Ц.Нямдорж шигээ зан гаргасан.

Тэрбээр олны өмнө гарч амиа алдсан цэрэг хүүгийн ижийд хандан эмгэнэл илэрхийлж, Салбартаа хариуцлага алдсанаа хүлээн зөвшөөрч уучлал гуйсан билүү.

Эсрэгээрээ сэтгүүлчдээс бултаж “Цэрэг зоддог үзэгдэл байхгүй. Баримттай ярь” гэх мэтээр маргалдаж байгаад явсан.

Ноён нуруутай, шударга гэгддэг Ц.Нямдорж, Н.Энхболд нар УИХ-ын залуу гишүүдэд үлгэрлэх бус тэднээс үлгэрлэхээр болжээ. Зам тээврийн яамны газрын дарга биенийхээ аминд хүрсэн хэрэгт сайд, дэд сайд нь хариуцлага хүлээж албан тушаалаасаа чөлөөлөгдсөнийг энд сануулъя.