Их Британийн ханхүүгийн эхнэр Меган Маркл хүү төрүүлэн, тэд дэлхий нийтийн анхаарлын төвд байгаа. Энэ сарын 06-нд тэд олны өмнө ил гарч, ард иргэддээ дэмжиж, адислаж байдагт баярлаж буйгаа илэрхийлсэн байна. Залуу хосын шинэ хүнээ хүлээн авсан сайхан мэдээнээс гадна Харригийн ярилцлага өгөхдөө өмссөн цамц олны анхаарлыг татаж, хэвлэлийн хуудсанд бичигдсээр байгаа юм. Шинэ аав болсныхоо дараа өгсөн анхны ярилцлагадаа өмссөн Харригийн цамц “Монгол ноолуур” байв. Барууны хэвлэлүүдэд түүнийг 100 хувийн монгол ноолууран цамц өмсч ирснийг онцолж байна.

Түүний өмссөн цамцыг барууны хэвлэлүүд энгийн хийцтэй боловч тансаг зэрэглэлийн 100 хувь Монголын ноолуураар хийсэн хэмээн онцлон бичиж байгаа аж. Ханхүү эхнэрээ төрөхөд нь хамт байсан бөгөөд тэд аз жаргалаар дүүрэн харагдаж байсан хэмээн Их Британийн хэвлэлүүд онцолжээ. Харри мөн өнгөрсөн аравдугаар сард Меганыг хөл хүнд болсон талаар зарлахдаа өмсч байсан цамцаа монгол ноолууран дотроо өмссөн байжээ. Сануулахад, Харри, Меган нар өнгөрсөн намар Австралид албан ёсны айлчлал хийхээр газардсанаасаа хэдэн цагийн дараа анхны хүүхдээ хүлээж байгаа талаараа зарласан юм.

Ханхүү хүүгийнхээ талаар “Бүх л эцэг, эх “Миний хүүхэд үнэхээр өхөөрдөм гэдэг. Үнэхээр л энэ бяцхан ертөнц маш гайхалтай. Би үнэхээр их жаргалтай байна” гэж ярьжээ. Тэрбээр өөрийн эхнэр Меганаар маш их бахархаж байгаагаа хэлээд “Биднийг дэмжиж, хайраа бидэнд түгээж байгаа та бүхэнд үнэхээр их баярлаж байна” гэсэн аж. Эхнэрээ төрөхөд дэргэд нь байх ямар байсан талаар асуухад Харри “Маш гайхалтай байлаа. Эхнэрээрээ үнэхээр их бахархаж байна” хэмээн Харри хариулжээ.