УИХ-ын чуулганы хуралдаанаар хууль тогтоож, бодлого ярихаас илүүтэй халаа сэлгээ, сандал суудлын маргааныг хэлэлцэх нь ихэссэн гэсэн шүүмж сүүлийн үед байнга яригдаж буй.

Монгол Улсын тогтвортой хөгжлийн үзэл баримтлал 2030 үр дүн, хэрэгжилт, холбогдох байгууллагууд хэрхэн ажиллаж байгааг яаралтай хэлэлцэх болсныг УИХ-ын гишүүн С.Бямбацогт сануулан Н.Амарзаяа, Д.Оюунхорол, Д.Эрдэнэбат нарын гишүүдийн хамт Ерөнхий сайд У.Хүрэлсүхэд хандан тавьсан асуулгын хариуг маргааш /2019.05.10/-ийн хуралдаанд сонсохыг хүссэн юм.

Тэрээр “Монгол Улсын тогтвортой хөгжил 2030” хэрэгжилтийн талаар тавьсан асуулгад урт, богино хугацааны бодлого хэрхэн уялдаж байна гэдгээ дүгнэж, 2018 оны Төсвийн гүйцэтгэл, Үндсэн чиглэлийн биелэлт, 2020 оны төсвийн хүрээний мэдэгдэл, 2021 оны төсвийн төсөөлөл, Засгийн газрын үйл ажиллагааны хөтөлбөрийн биелэлт гээд дунд болон урт хугацааны бодлогын бичиг баримт хэрхэн яаж биелж байна. Цаашдаа юунд анхаарах вэ гэдгээ ярих гээд байгаа юм. Үүний өмнө бодлогын уялдаа холбоо, залгамж чанарын ойлголтоо нэгтгэж авмаар байна. УИХ, Засгийн газрын баталсан 500 гаруй бодлогын бичиг баримт байгаа. Үүнээс өнөөдөр 200 гаруй нь хүчин төгөлдөр, үлдсэн нь хүчингүй болсон.

Бодлогын бичиг баримтын уялдаа холбоог хангах, давхардал хийдлийг арилгах, төрийн бодлогыг тогтвортой хэрэгжүүлэх бүтцийг бий болгох гэх зэрэг асуудлуудыг урт хугацааны бодлогын баримт бичгүүдэд оруулсан байгаа. Харамсалтай нь энэ ажил хийгдэхгүй байна. Бодлогын уялдаа холбоог хангах, тогтвортой байдлыг бий болгох чиглэлээр ажиллах хэрэгтэй” гэлээ.