ХЗДХ-ийн сайд Ц.Нямдоржоос С.Зориг агсны хэрэгтэй холбоотой дараах асуултуудад хариулт авлаа.

-Байнгын хорооны өчигдрийн /2019.05.08/ хуралдаанаар авахыг Засгийн газарт С.Зориг агсны хэрэгт холбогдогчдод хуулийн хүрээнд яаралтай арга хэмжээ чиглэл өгөх тухай яригдсан. Одоо үйл явц хэрхэн өрнөх вэ?

-Цагдаа дээр эрүүдэн шүүсэн, гүйцэтгэх ажиллагааны хууль зөрчсөн гэсэн хоёр хэрэг шалгагдаж байгаа. Хуулиараа прокурор шинэ нөхцөл байдлын дүгнэлт бичих ёстой. Дараа нь Дээд шүүхийн хурлаар орно. Гурван асуудал хэлэлцэгдэх байх. Хамгийн эхлээд эрүүдэн шүүсэн асуудал, хоёрдугаарт гүйцэтгэх ажиллагааны хууль зөрчсөн асуудал, гуравдугаарт Б.Содномдаржаа, Т.Чимгээ хоёрыг хэрхэх вэ гэдэг асуудал яригдах байх.

-Б.Содномдаржаа, Т.Чимгээ нарыг хэрхэх вэ. Сулласны дараа ямар процесс өрнөх вэ?

-Хэлмэгдэж, хэлсээр шийтгүүлсэн бол хохирол нөхөн төлөх тухай асуудал яригдана. Гэхдээ төлж чадахгүй. Энэ хүмүүсийн амьдралд учирсан дөрвөн жилийн гашуун гай зовлонг ямар ч үнээр төлж чадахгүй. Цаад талд нь үр хүүхэд нь, ээж нар нь, ах дүү нар нь хохирсон. Үр хүүхэд нь насан туршдаа С.Зоригийн амь насанд халдсан хүмүүсийн хүүхэд гэдэг толботой үлдэх нь хамгийн аймшигтай.

-С.Зоригийн хэргийн захиалагчийг илрүүлэх ажилд ахиц гарсан уу. Шалгагдах уу?

-Тагнуул дээр байгаа. Шалгагдана. Шүүхийн шийдвэртэй асуудал захиалагчийг илрүүлэхэд асар их саад учруулах байх. Бүр төөрүүлээд хаячихсан юм билээ.

-Б.Булган хохирогчоор шалгагдаж байгаа юу, хэргийн хамжигчаар шалгагдаж байгаа юу?

-Б.Булганыг арван сар хориод сулласан. Юу ч биш болгосон. Гэрт нь байсан цорын ганц хүн бол яалт ч үгүй Б.Булган. Гэрч биш болсон, хохирогч ч биш болсон. Ертөнцийн түүхэнд байж боломгүй сонин зүйл болсон. Хажууд нь байсан цорын ганц амьд гэрчийг оролцуулалгүй шүүх хурал хийнэ гэж юу байдаг юм бэ. Б.Булганы ам зургаар Содномдаржаа, Чимгээ нарыг хорьсон шүү дээ. Зургийг нь зуруулсан хүнийг шүүх хуралд оруулж байцаах ёстой юм байгаа биз дээ. Одоо захиалгатайгаар элдэв юм ярьж байна. Ямар ч байсан эрүүдэн шүүсэн нь дэндүү тодорхой болсон асуудал. Өдрөөс өдөрт шинэ баримт гарч ирж байгаа. Гүйцэтгэх ажиллагааны хууль зөрчсөн явдал дэндүү ойлгомжтой байгаа. Алхам тутамдаа хуулийн зөрчил байсан.

-Эрүүдэн шүүх даалгаврыг хэн өгсөн бэ?

-Шалгалтын явцад тогтоогдоно. Бие бие рүүгээ чихээд байгаа гэсэн. Хоригдож байгаа гурван хүн байна. Цаашид хариуцлагад татах хүмүүс нэмэгдэнэ.

-Эрүүдэн шүүсэнтэй холбогдуулан хэдэн хүн хоригдож байгаа вэ?

-Одоо ч хүмүүс нэмэгдэж хоригдох биз. Одоогийн байдлаар гурван хүн хоригдож байна. Цаашид хариуцлагад татагдах хүмүүсийн тоо нэмэгдэнэ.

-Б.Хурцыг ямар учраас үргэлжлүүлэн хорих шийдвэр гаргасан юм бол?

-Би яаж мэдэх вэ. Хорих шийдвэр гаргасан байгууллагаас нь асуу.

-Авлига авсан МХЕГ-ын албан тушаалтнуудын хэргийг хөөн хэлэлцэх хугацаа дууссан гээд шүүхээс хаасан байдаг. Энэ тал дээр ямар байр суурьтай байна вэ?

-Үүнийг судлах хэрэгтэй. Судлах талаар гишүүд ярьж байгаа. Өчигдөр ХЗБХ-нд эл асуудал яригдсан. Судла гэдэг үүрэг өгчихсөн.

-Таныг Хууль зүйн дэд сайд асан Б.Энхбаярыг өрөөндөө дуудаж оруулаад хөөн хэлэлцэх хугацаатай холбоотойгоор дарамталсан тухай ярилцлагадаа дурдсан байсан. Та дарамталсан юм уу?

-Тийм яриа огт болоогүй. Худал мэдээлэл байна.

-Албан тушаалтнуудад зориулж хуулиа зориудаар өөрчилсөн юм биш үү?

-Шалгалтын дүн гарч ирэхээр энэ асуултаа асуу.