Төв аймгийн Сүмбэр сумын ерөнхий боловсролын сургуулийн сурагчид сүрьеэ өвчнөөр өвчилсөн талаар тус сумын иргэд Эрүүл мэндийн яамны /ЭМЯ/ гадна өчигдөр мэдээлэл хийсэн. Улмаар мэргэжлийн бус хүн эрүүл мэндийн салбарыг удирдсанаас болж энэхүү өвчин тархаж байна гэж үзэж буйгаа илэрхийлж, Эрүүл мэндийн сайд Д.Сарангэрэлийг огцрохыг шаардаж байлаа. Тэдний өгч буй мэдээллээр өнөөдөр Сүмбэр сумын ерөнхий боловсролын сургуульд 288 хүүхэд сурч байгаагаас 197 хүүхэд сүрьеэгийн халдвартай гэж тодорхойлогджээ. Тэднээс идэвхитэй сүрьеэтэй 32-34 хүүхэд байгаа бөгөөд эмнэлэгт хэвтэж байгаа зургаан хүүхэд байгаа аж.

-НЭГ АЙЛЫН ДӨРВӨН ХҮҮХДИЙН ХОЁР НЬ ХАЛДВАР АВСАН-

Сүмбэр сумын иргэн С.Баясгалан ярихдаа “Миний төрсөн ах Солонгос руу ажил хийхээр явсан. Дөрвөн хүүхдийнх нь зургаа, долдугаар ангийн хоёр хүүхэд нь халдвар авчихсан. Гэртээ маск зүүгээд л байж байна. Хоёр бага нь нэг нь цэцэрлэгт, нөгөө нь бага ангид байдаг. Тэр хоёртоо бас халдаачих юм болов уу гээд санаа зовж байна. Ядаж байхад ээж нь бие муутай. Түгшүүртэй л байна.” гэлээ.

Бид тус сумын эмнэлэгт сүрьеэ өвчний халдвар авсан хүүхдүүдийн эцэг эхийн төлөөлөл болох Б.Бямбажаргалтай ярилцлаа.

Б.БЯМБАЖАРГАЛ: ЖИЖИГ СУМАНД 200 ХҮҮХЭД ХАЛДВАР АВНА ГЭДЭГ НОЦТОЙ АСУУДАЛ

Өмнө нь танай суманд сурагчдын дунд нэгдмэл байдлаар ямар нэг эрүүл мэндийн үзлэг оношлогоо хийдэг байсан уу?

-Бидний хүүхдүүдийг ар бүр үзлэг оношлогоонд нь оруулдаг байсан бол ийм байдалд хүрэхгүй байх байсан. Хүүхдүүдийн бие хүнд байгаа учраас эцэг эхийн төлөөлөл бид энд хүрч ирж Эрүүл мэндийн яаманд хариуцлага тооцуулахын тулд тэмцэж байна.

-Ийм олон хүүхэд халдвар авчихсан байхад эмчилгээ хийж эхэлсэн үү?

-Манай хүүхдүүдэд өдөр бүр 11-12 цагийн үед тогтмол цагаар эм уулгаж байгаа. 200-аад хүүхэд сүрьеэгийн эм ууж байгаа нь жижиг сумын хэмжээнд ноцтой асуудал болоод байна. Ямар нэртэй эм болохыг нь ч мэдэхгүй. Зургаан сарын турш тогтмол уух ёстой гэсэн. Олон улсад долоо хоногт нэг удаа уудаг эм гарчихсан юм байна. Энэ эмийг авчираад өгөөч. Бид үр хүүхдүүдийнхээ эрүүл мэндийг хамгаалмаар байна.

-Та бүхэн хүүхдүүдээ сүрьеэгийн халдвар авсаныг яаж мэдсэн юм бэ?

-Тавдугаар сарын эхээр мэдсэн. Аймгаас гэнэт л эмч нар ирээд сорил тавьж шинжилгээнд хамруулсан. Тэгж байж л халдвар авсаныг нь мэдсэн. Тэрнээс биш ямар нэг зовиур илрээгүй болохоор мэдээгүй байсан.

-Сургуулийн орчин, дотуур байр ер нь эрүүл ахуйн хувьд хэр вэ?

-Сургуулийн орчин тийм сайн биш. Биеийн тамирын заал гэхэд сургууль дотроо байдаггүй. Сургуулиас гараад тусдаа заал руу орж, гарах гэж өвлийн хүйтэнд хүүхдүүд даарч хөрч, хөлстэй орж гарсанаас болж бас энэ өвчний халдвар хурдан тархсан гэж бид үзэж байгаа. Өглөө орой хоёр ээлжээр нэг ангидаа 25-35 хүүхэдтэй хичээллэдэг. Дотуур байр нь бас муу. Дээрээсээ дусаал дусдаг хуучин байрыг дахиад дээвэр хийж байгаа. Ямар нэмэр байхав дээ.

-Танай сумын нэг багшаас бас халдвар илэрсэн гэсэн. Та бүхэн багшийг энэ өвчнийг халдаасан гэж буруутгаж байгаа юу?

-Бид халдвартай багшийг буруутгахаасаа илүү эрүүл мэндийн яамыг удирдаж байгаа. Удирдлагуудын буруутай үйлдлээс болж ийм байдалд хүрсэн гэж үзэж байна. Сар бүр хүүхдүүдийг үзлэг оношлогоонд оруулдаг байсан бол энэ өвчнөөр халдварлахгүй байсан байх. Үүний цаана маш том асуудал байгаа. Энэ хэдэн сургуульд илэрсэн нь маш том асуудлын дөнгөж үзүүр нь.

-ТӨР ЗАСГААС ЯМАР Ч САНААЧЛАГА ГАРГАЖ АЖИЛАХГҮЙ БАЙГААД БУХИМДАЖ БАЙНА-

-Эрүүл мэндийн сайд Д.Сарангэрэл та бүхэнтэй уулзсан уу?

-Эрүүл мэндийн сайд ажил дээрээ байгаа бол гарч ирээд бидэнд мэдээлэл өгөх хэрэгтэй байтал тэгсэнгүй. Одоо халдвар аваагүй бусад хүүхдүүдийг яах гэж байгаа юм бэ. Засгийн газрын нөөц сангаас хөрөнгө мөнгө шийдээд одоо энэ өвчний эсрэг аян өрнүүлж ажилламаар байна. Гэтэл яам, төр засгаас ямар ч санаачлага гаргахгүй байгаад иргэд бид бухимдаж байна.

-Эмч нарыг энэ өвчинд хамруулан буруутгаж байгаа нь буруу гэж хандлага бас байгаа?

-Бид эмч нар луу хандаж та нар ажлаа хийж чадсангүй гэдэг байдлаар огт дайралт хийгээгүй. Эрүүл мэндийн сайд сайн ажиллаж чадахгүй байна гэж л бид тэмцэж байна. Та нар ард түмнээсээ айж хэрэггүй. Тэр сүрьеэ өвчнөөсөө ай. Өнөөдөр Монголын ирээдүй болсон хүүхдүүдийн нэг хоёроор нь биш хэдэн зуугаар нь өвчлүүлчихээд хүүхдүүдийг эмчил, мэргэжлийн хүнээр яамаа удирдлуул гэж шаардлага тавихаар хаалгаа түгжчихээд сууж байна. Нийгмийн халдварт сүрьеэ өвчин хүний дархлаа сулрангуут эргээд тусдаг өвчин. Дэлхий нийтээрээ айдаг өвчин. Бид энэ яамыг ажил үүргээ эрчимтэй явуулаач гэж шаардаж байна.