ТББ-ынхан нэгдэн “МАНАН дэглэмийн эсрэг Монгол түмний нэгдэл”-ийг байгуулан Дээд шүүхийн шүүгчдийг огцруулахыг шаардан жагсаал зохион байгуулж эхэлсэн. Дээд шүүхийн гишүүдийг бүрэн бүрэлдэхүүнээрээ огцрох шаардлагыг хүргүүлсэн тэд өнөөдөр 14.45 цагт хариугаа авах юм. Шүүгчдийг Салхитын мөнгөний ордтой холбоотой авлига авсан гэх мэдээлэл гарсан даруй “МАНАН дэглэмийн эсрэг Монгол түмний нэгдэл”-ийн төлөөлөл Х.Оюунцэцэг, А.Алтантуяа нартай ярилцлаа.

-Та бүхний тэмцлийг үр дүн эхнээсээ гарлаа гэж нийгмийн сүлжээгээр олон нийт бичиж эхэллээ. Ерөнхийлөгч өчигдөр орой зарлиг гаргаж нэр бүхий 17 шүүгчийн бүрэн эрхийг түдгэлзүүлжээ?

-Х.О-Энэ мэдээлэл олон нийтийг цочирдууллаа. Нийтийн эрх ашгийг уландаа гишгэж нэг хэсэг хүмүүс их хэмжээний авлига авна гэдэг байж боломгүй хэрэг. Энэ мэт хууль бус үйлдлийг зогсоож, МАНАН-гийн дэглэмийн шүүгч нарыг огцруулахын төлөө бид жагсаж байна.

-А.А-Асуудал ямар том болж, хагарашгүй идээ бээртэй хатиг болжээ. Үндэсний Аюулгүй байдлын зөвлөлийн хэмжээнд хүрснийг олон нийт харж байна.Түдгэлзүүлсэн шүүгчдийн нэр албан тушаал ил боллоо. Анхан, дунд, дээд шатны бүлэглэл болсон шүүгч нар байгаа нь ил боллоо.

-Шүүх засаглал хэзээнээс МАНАН бүлэглэлд орсон гэж та бүхэн үзэж байна вэ. Энэ бүлэглэлд багтсан шүүгчдийг та бүхэн нэрлэж чадах уу?

-Х.О-Хэлэлгүй яахав. Би Хадгаламж зээлийн хоршооны хохирогчдыг хамгаалах холбоо байгуулаад тэмцэж байсныг та бүхэн мэднэ. Маш олон иргэн хохирсон энэ асуудлыг шүүгч Ч.Хосбаяр шүүсэн. Энэ хүн бас VII сарын 1-ний хэргийг шүүхдээ хоморголон барьж саатуулан, олон нийтийн эсрэг шийдвэр гаргасан. Хожим нь МАХН-ын дарга Н.Энхбаярын хэргийг бас л энэ хүн шүүсэн.

Дараагийн шүүгч бол Х.Идэр. Энэ хүн ямар учиртай бэ гэдгийг бид мэднэ. Х.Идэрийн аав Д. Хувьтөгөлдөр бол Ерөнхийлөгч асан Ц.Элбэгдоржийн баруун гар. Одоо ямар нэгэн ажил эрхэлдэггүй хэрнээ Эрдэнэтээс цалин авч, байранд нь амьдарч байх жишээтэй. Х.Идэрийн ах Х.Тамир Тээврийн прокурорт ажиллаж байсан. Энэ хүн хар тамхи зөөж байгаад баригдсан. Гэсэн хэдий ч ял шийтгэлгүй салсан байгаа юм. Шүүгч Батсуурь гэж хүн бий. Энэ хүн Худалдаа хөгжлийн банканд ажилладаг байсан бөгөөд Эрдэнэтийн 49 хувийг хууль бусаар авахад шүүхийн талаас бас нөлөөлсөн.Олны ярьдгаар “сахал” хэмээгддэг Д.Эрдэнэбилэгийг хэдхэн хоног саатуулаад гаргаж байгаа хүмүүс нь ердөө эд нар шүү дээ.

-Хууль хүчний байгууллагын талаар санаанд багтамгүй мөнгөн дүн, авлига, сэтгэл өвдмөөр үйлдлүүд ар араасаа гарсаар байх юм. Энэ хэрэг тэгсхийгээд л замхрах шинжтэй байдагт шүүх засаглал буруутай гэж та бүхэн харж байна уу?

-А.А-Тийм ээ. Үнэхээр шударга шүүх байхгүй болохоор шүүгч нар хүссэн шийдвэрээ гаргаж, дээрээс өгсөн чиглэлээр асуудлыг хардаг болоод удлаа. Энэ хонгил, МАНАН дэглэмийн нураах гарцаагүй шаардлага байгааг хүн бүхэн ойлгож байна.

-МАНАН дэглэм, шударга бусын хонгил нутагшаад олон жил болсон гэдгийг та бүхэн хэллээ. Салбар бүрийн шат бүхэнд энэ хонгилын гишүүн байгаа нь харамсалтай. Энэ хонгил хэзээ нураах бол. Та бүхэн итгэлтэй байна уу?

-А.А- Шүүгчид хууль бус шийдвэрээ хамгаалах хууль зүйн зохицуулалтаа бат хийж авсан байгаа юм. Тухайлбал

21 дүгээр зүйл.Шүүгчийн үйл ажиллагаанд хөндлөнгөөс оролцохыг хориглох

21.3.Шүүгчээс хянан шийдвэрлэж байгаа болон хянан шийдвэрлэсэн хэргийнх нь талаар өөрийг нь холбогдуулан хэрэг бүртгэх, мөрдөн байцаах үйл ажиллагаа явуулж байгаа байгууллага, албан тушаалтан тайлбар, мэдүүлэг авахаар шаардахыг хориглоно.

26.3.Шүүгч эрх мэдлээ урвуулан ашигласан, илт хууль бус таслан шийдвэрлэх тогтоол, шийдвэр, шүүхийн бусад акт гаргасан гэмт хэрэгт гэм буруутай нь шүүхийн хүчин төгөлдөр тогтоолоор нотлогдоогүй бол бүрэн эрх нь дуусгавар болсны дараа шүүн таслах ажил эрхэлж байх үедээ илэрхийлсэн санал, гаргасан шийдвэрийнх нь төлөө түүнийг ямар нэгэн хариуцлагад татахыг хориглоно гэх мэт маш ноцтой заалтуудыг оруулж өгчээ. Хуулиараа хаалт хийж, захиалгаар шийдвэр гаргах эрхээ баталгаажуулсан нь илт. Ийм байж болохгүй.

-Х.О-Та бүхэн анзаарсан байх. Дээд шүүхийн дарга Ц.Зоригтыг сольсон гэх ч багт нь байсан шүүгч нар нь өөр нэгнээ томилж, Ц.Зоригт өөрөө Дээд шүүхдээ байсаар л байна. Нэмэгдэхүүний байрыг солиход нийлбэрийн чанар өөрчлөгдөхгүй шүү дээ. Шүүхийн ерөнхий зөвлөлийн гишүүний сонгууль ямар их будлиантай болж байна аа. Хонгилынхоо хүнийг багтаах оролдлогоо хийсээр удаалаа. Чөтгөрийн тойрог мэт болсон шүүх засаглалыг өөрчлөхийн төлөө бид тууштай тэмцэнэ.

-Салхитын мөнгөний ордыг тойрсон авлигын хэрэгт шүүгчид нэр холбогдоод байна. Та бүхэнд энэ талаар илүү дэлгэрэнгүй мэдээлэл байна уу?

-Х.О-Баримт байгаа гэдгийг УИХ-ын дарга өөрөө хэлсэн байна лээ. Баримтаа удахгүй дэлгэх байх.Талийгаач Бямбаа шүүгчийн үхэл зүгээр нэг амиа хорлосон хэрэг биш шүү дээ. Тэр хүн цорын ганц гэрч нь байсан юм. Насаараа хууль хяналтын байгууллагад ажилласан хүн гэнэт амиа хорлоно гэж байхгүй.

-Та бүхэн шаардлага хүргүүлсэн гэсэн . Хэзээ хариугаа авах вэ. Мэдээж Дээд шүүх шууд бүрэлдэхүүнээрээ огцрохгүй байх. Ямар алхам хийх вэ?

-А.А-Одоо 14.45 цагт хариугаа авна. Тэгээд бид Ерөнхийлөгчийн Тамгын газарт албан бичиг, шаардах хуудас өгнө.

-Шударга бус шүүх засаглалыг нураахын төлөө тэмцэж буй та бүхэнд амжилт хүсье. Цаг зав гарган ярилцсанд баярлалаа.