Японы мэргэжлийн сумо бөхийн 69 дэх их аварга Хөдөлмөрийн баатар, МУГТ Хакухо М.Даваажаргал Япон улсын иргэн болсон тухай NHK мэдээлснээр олон нийт шуугиж эхэллээ. Түүнийг эх орноосоо урвасан, харь нутгийн хүн боллоо, улсын хилээрээ оруулахгүй байх хэрэгтэй гэх мэтчилэн бичиж эхэлсэн. Олны анхаарал татсан сэдвээр Хакухо М.Даваажаргалын ээж Ө.Тамиртай ярилцлаа.

-Сайн байна уу. Сайхан намаржиж байна уу?

-Сайхаан сайхан намаржиж байна уу.

-Та бид хоёср өмнө нь хэд хэдэн удаа аваргын амжилт гаргах тэр агшинд ярилцаж байлаа. Өнөөдөр арай өөр сэдвээр ярилцах нь?

-Харин тиймээ NHK-ээр мэдээ цацагдсан даруй л миний утас чөлөө завгүй дуугарах боллоо.

-Энэ үйл явдал өчигдөр яриад өнөөдөр шийдэгдсэн хэрэг огт биш. Олон сарын өмнөөс л яригдсан шуугисан. Гэсэн ч та Японы тал шийдвэрээ гаргасан тухай хэзээ мэдэв. Энэ тухай мэдээд хүүтэйгээ ярьсан уу?

-Өнгөрсөн даваа гаригт мэдлээ. Сонсоод шууд л хүүтэйгээ ярилаа. Хүү жоохон ярьж байгаад “Ээж ээ хүү нь уулзалттай, дараа нь ярилцлагад орох гэж байна. Ажлаа дуусгаад тухтай ярина аа” гэсэн. Хүү маань хүний газар хийж чаддаг зүйлээ хийгээд , өөрийн хүсэл тэмүүллээр амьдарч байгаа. Хэдий би ээж нь ч “Чи боль, Монголд ир энд амьдар” гэж хэлэх эрх байхгүй. Биеийг нь төрүүлэхээс ухааныг нь төрүүлэх биш дээ бид чинь. 15-хан насандаа Японыг зорьсон хүү маань Их аварга болно, япон бүсгүйтэй гэр бүл болно, иргэншлээ сольж дэвжээ байгуулна гэсэн бодолгүй л байсан байх. Хувь заяаны төөргөөр амьдрал нь ингэж өрнөж байна.

-Мөөеө аваргыг амьд сэрүүн байхад энэ асуудал яригдаж л байсан. Аавтайгаа зөвлөж байсан уу?

-Бид ингэ тэг гэж заадаггүй. Ялангуяа нас биед хүрсэн цагаас нь хойш. Эхнэр авахдаа аавтайгаа яриад “Монгол Японы харилцаанд сайн биз дээ” гээд л инээж байсан.

-Иргэншлээ сольсон асуудал Монголд төдийгүй Японд ч бас дуулиан шуугиан тариад байгаа сурагтай. Японы сэтгүүлчид таниас ярилцлага авсан гэсэн үү?

-Тэгсээн. Японы сэтгүүлчид надаас болон монгол хүмүүсээс санал бодлыг нь аваад байгаа юм билээ. Японы сэтгүүлч “2020 оын олимп хаяанд ирлээ. Та аль улсыг дэмжих вэ” гэж асуусан байгаа юм. Хүү маань “Хоёуланг нь дэмжинэ” гэж хэлсэн гэсэн.

-“Монгол тулгатны 100 эрхэм” нэвтрүүлгээр орохдоо “Би их азтай хүн юм. Аз гэхдээ хөдөлмөрлөсөн хүнд ирдэг юм ” гэж ярьж байснаас үзэхэд хүч тэнхээтэйн дээр их ухаан гаргаж амьдарч байгаа нь илт мэдрэгддэг?

-Уулзах ёстой хүмүүс л уулзаж, учрах ёстой хүмүүс учирдаг гэсэн үг байдаг даа. Тавилангаараа л яваа хүн. Миний ах, хүргэн ах гадаад харилцааны ажилтан, дипломатч байсан. Японд ажиллаж амьдарч хоёр орны хөгжилд хувь нэмэр оруулж байсан түүхтэй.

-Иргэншил өөрчлөгдлөө гээд М.Даваажаргалын бие сэтгэл нь, Монголоо гэх сэтгэл зүрх нь хэвээрээ гэдэгт итгэлтэй байна. Монголчууд нийгмийн сүлжээгээр арай л дэндүү бичиж, доромжилж, нэгнийгээ гутаах юм. Яагаад ийм байдаг юм бэ. Та их эмзэглэж байна уу?

-Би Монголын ард түмэндээ уурлахгүй, буруутгахгүй. Бид чинь бөх, морь, сураа хайрлан дээдэлж, хүндэтгэдэг. Ханийг минь хайрлаж хамгаалж байдаг шигээ хүүг минь хайрлаж харамлахдаа л тэгж бичиж байгаа шүү дээ. Би огт буруутгахгүй ээ. Миний хүүг ямар их хайрлаж, харамлаж байгааг нь мэдэрч байна.

-Ардын уран зохиолч Б.Лхагвасүрэн агсан Хакухо аваргын багш Тазаки Макототай уулзаад “Дэгдээхийн чинээ хүүг дэлхийн энтэй болгож өгсөн танд маш их баярлалаа” гэж хэлж байсан нь тодхон санагдаж байна. Монголчууд уужуу ухаантай, алсыг харсан бодолтой хүмүүс. Хүүг тань ойлгож дэмжинэ гэдэгт итгэлтэй байна. Спортын төрөлд монголчууд илүү амжилт гаргахад дэмжлэг үзүүлж, гүүр болох байх?

-Монголчууддаа эгч нь итгэж байна. Хүү минь эх орон, элгэн саднаа гэсэн сэтгэл зүрх нь хэвээрээ шүү. Хүүг минь ойлгож, хайрлаж дэмжээрэй. Хүүг минь ойлгож, зөв ойлголт өгөхөөр хандсан та бүхэнд маш их баярлалаа.

-Цаг зав гарган ярилцсанд баярлалаа. Танд аз жаргал урт удаан наслахыг хүсье.