-Улс орны эрх ашигт хор хөнөөл бололгүй шиг “зарим хэрэгт өвс мэт дарагдваас зохих” мэт ээ-

Өнгөрсөн долоо хоног үндсэндээ Евразийн эдийн засгийн коридорын тухай сэдвээр давалгаалсан өдрүүд өнгөрлөө. Дэлхийн банк, ГХЯ, ЗТХЯ зэрэг газруудаас энэ талаар хурал форум зохион байгуулж, Элчин сайд асан Л.Хангай, ГХЯ-ны газрын дарга нарын албаны хүмүүс эдийн засгийн коридор, ОХУ-БНХАУ-Монгол Улсын дэд бүтэц, эрчим хүч, төмөр зам гээд тив дамнасан эдийн засгийн гүүрийн талаар яриа өгч эхэлсэн. Тэр ч бүү хэл ОХУ-аас БНХАУ руу тавих хийн хоолойг Монгол Улсын нутаг дэвсгэрээр дамжуулах нь гэж баахан хөөрцгөөв. Энэ нь ч бас зүгээр нэг хий хоосон хөөснөөс үүсчихсэн яриа биш. Учир нь Монгол Улсын Ерөнхий сайд У.Хүрэлсүх өнгөрсөн долоо хоногт ОХУ-д хийсэн төрийн айлчлалынхаа үеэр ОХУ, БНХАУ-ыг холбосон байгалийн хий дамжуулах хоолойг Монголын газар нутгаар дамжуулах тухай саналаа тавьсныг хойд хөршийн төр, засгийн тэргүүнүүд нааштайгаар хүлээн авлаа гэсэн албаны мэдээллээс үүсэлтэй юм. Энэ талаар манай “хэтэрхий мэргэн жараахай”-нууд ухаанаа уралдуулцгааж байна. Цаашид хийн хоолой Монголоор дамжих эсэх нь цаг хугацааны л асуудал болж таарна. Хорин жил яригдсан хий хоосон мөрөөдлийн хоолой тавтгдахгүй, цаашдаа ч арван жилийн дэмийрэл, дэмий мөрөөдөл болно гэх хардлага хандлага нийгэмд байгаа юм.

Ерөнхий сайд У.Хүрэлсүх энэ сарын 5-ны үдэш Улаанбаатарын цагаар 21.00 цагт Сочи хотод ОХУ-ын Засгийн газрын Шадар сайд А.В.Гордеев тэргүүтэй төлөөлөгчидтэй уулзалт хийсний дараа ОХУ-ын Ерөнхийлөгч В.В.Путин, “Газпром”-ын тэргүүн А.Б.Миллер нарын хүмүүстэй байгалийн хийн хоолойг Монголын нутгаар дамжуулах асуудлаар албан ёсны хэлэлцээ хийсэн байдаг. Энэ үеэр Монгол Улсын нутаг дэвсгэрээр байгалийн хий дамжуулах хоолой байгуулах асуудлаарх Санамж бичигт Засгийн газрыг төлөөлж Монгол Улсын Шадар сайд Ө.Энхтүвшин, ОХУ-ын талаас “Газпром”-ын тэргүүн А.Б.Миллер нар гарын үсэг зурсан тухай албан ёсоор мэдээлсэн билээ. Оросын тал энэ асуудал дээр “Зургаан сарын хугацаанд судалж үзье” гэсэн хариуг манай талд өгсөн юм билээ. Хоёр гүрнийг холбосон байгалийн хийн хоолой бол урьдын сайн цагийн Их Монгол Улсын үеийн Ази-Европыг холбосон Их торгоны замтай эн тэнцэхүйц чухал стратегийн асуудал мөнөөс мөн учраас манай үе үеийн Засгийн газрын тэргүүнүүд, төрийн өндөрлөгүүдийн “Үүнийг л нэг бүтээчих юм сан” гэсэн алсын мөрөөдөл болсоор ирсэн юм. Хоёр хөршийг холбосон байгалийн хий дамжуулах хоолойг манай улсын газар нутгаар дамжуулан тавибал Монгол Улс татвар авна, мөн хий авч хэрэглэх боломж бүрдэнэ гээд Монгол Улсад эдийн засаг, хөгжилд бүх талын ач холбогдолтой болохыг Сангийн сайд Ч.Хүрэлбаатар сэтгүүлчдэд мэдээлэл өгөхдөө онцолж байсан.

Зарим хэвлэлд үүнийг “Хийн хоолой эзгүй цөл шахам Монгол Улсын нутгаар дамжин өнгөрөхөд ямар ч ашиггүй учир юу боллоо гэж дамжуулах вэ дээ” гээд нэг ёсондоо сэтгэлээр “үхээд” эхэлсэн.Даарин дээр давс гэдэг шиг Монгол Улсын дөтгөөр Ерөнхийлөгч асан Монголын Цахиагийн Элбэгдорж арванхоёрдугаар сарын 6-ны үдэш “Хоёр тал оролцоод хийчихэж болох төслийг Оросууд “судалъя” гэвэл “үгүй”, “Энэ асуудлыг яахаа өөрсдөө мэд гэвэл “Манайхгүйгээр танайх энд юу ч шийдэхгүй” гэж, “Урд хөршөөсөө асуу гэвэл хоёр хөрш маань уг асуудлыг явуулахгүй байхаар тохирчээ гэж ойлгоход илүүдэхгүй” буюу энэ асуудал огт хэрэгжихгүй гэсэн утга агуулгаар өөрийн твиттер хуудсандаа жиргэсэн байх юм. Урьдын цагт улсын тэргүүн байсан иймэрхүү сэтэртэн хүмүүс Нагаржунай гуайн хэлсэнчлэн “зарим хэрэгт өвс мэт дарагдаж, зарим хэрэгт уул мэт бат сууваас зохих” атал ийнхүү хэл амаа билүүдэх нь бүхэл бүтэн улс орны эрх ашигт ч хор хөнөөлтэйг мань мэтээр хэлүүлэлтгүй мэдмээр юм сан даа.