Улсын ерөнхий прокурор Б.Жаргалсайханы саналын дагуу УИХ-ын гишүүн Н.Номтойбаярын бүрэн эрхийг түдгэлзүүлэх эсэх асуудлыг УИХ-ын Халдашгүй байдлын дэд хороогоор хэлэлцлээ. Ингээд гадаадад томилолттой яваа, УИХ-ын гишүүний халдашгүй байдлын дэд хорооны хоёр гишүүн Ч.Улаан, Д.Лүндээжанцан нарыг Монголд ирсний дараа дахин хуралдаж, шийдвэрээ гаргахаар болжээ.

УЕП Б.Жаргалсайхан: "Би зөвхөн санал өгсөн. УИХ-ын гишүүний халдашгүй байдлын дэд хороо шийдвэрээ гаргаагүй байна. Тиймээс би үндэслэлийг одоо хэлэх боломж алга" гэлээ.

УИХ-ын гишүүн Ц.Нямдоржоос тодруулахад “Н.Номтойбаярын бүрэн эрхийг түдгэлзүүлэх санал нууцын зэрэглэлтэй энэ сарын 15-ны өдөр УИХ-д ирсэн. Өнөөдөр түр хороо гурван гишүүний ирцтэйгээр хуралдлаа. Халдашгүй байдлын хороо таван гишүүний бүрэлдэхүүнтэй. Д.Лүндээжанцан гишүүн УЕП-ын санал ирэхээс өмнө гадаадад томилолтоор явчихсан байсан. Ч.Улаан гишүүн УЕП-ын бичиг ирсний дараа буюу өчигдөр гадаадад томилолтоор явсан. Иймээс Халдашгүй хорооны хурлыг бүрэн бүрэлдэхүүний ирцтэй хийх хэрэгтэй гэж гишүүд үзсэн учраас өнөөдрийн хурал завсарлаж байна. УИХ-ын гишүүн Д.Лүндээжанцан энэ сарын 19 –нд ирнэ. Ч.Улаан гишүүнийг дуудуулж магадгүй. Ингээд ирэх долоо хоногт энэ асуудлыг хэлэлцэнэ. Энэ асуудал яалт ч үгүй хууль зөрчихөөр боллоо. УИХ-ын гишүүн Н.Номтойбаярыг Халдашгүй байдлын дэд хорооны хуралд оролцуулна. Түүний хүсэлтээр дэд хорооны хуралдааныг нээлттэй явуулах боломжгүй. Учир нь УЕП-оос нууцын зэрэглэлтэйгээр асуудлыг оруулж ирсэн” гэв.