Дархан-Улаанбаатар чиглэлийн зам там болоод хагас жил боллоо. 224 км энэ замыг суудлын тэрэг дунджаар гурван цаг орчим туулчихдаг байсан. Харин одоо бол хаа сайгүй үүссэн нүх бүрийг тойрч огцом тоормослосоор жолооч ч зүдэрч байна. Зорчигчид элэг, бөөрөө унагах шахсаар арай хийн дөрвөн цаг гаруй явж ирж байна. Хот хоорондын зорчигч тээврийн том автобус бол бүр ч ярилтгүй. Зургаан цаг сэгсчүүлсээр арайхийж зорьсон газартаа ирж байгаа. Хол замд ийм удаан, байнга шахам займчуулж явахад хүүхэд багачууд уйлагнаж, хөгшчүүдийн даралт ихсэн, залуучуудын тэвчээр барагдаж байна. Тэр дундаа Төв аймгийн Баянчандмань сумаас Баруунхараа, Хонгор сум хүртэл зам үнэхээр там. Жижиг тэрэгтэй явж байгаа жолооч нар дугуйгаа хоёроос гурав хагалж үйлээ үзэж, үсээ үгтээдэг. Заримынх нь бүх дугуй хагараад явах боломжгүй болчихсон зам дээр гар өргөн хэн нэгнээс тусламж гуйгаад зогсож байх нь хэчнээн гунигтай гээч. Энэ л тамын новшийн замаас болж амьдралаа залгуулах гээд замд гарсан жолооч нарын машины дотоод эд анги авах юмгүй болж, эд хөрөнгөөрөө хохирсоор л байгаа нь харамсмаар.

Дархан-Улаанбаатарын зам ингэж “там” болоод найман сарын нүүр үзлээ. ЗТХЯ-ын сайд Б. Энх-Амгалан “2019 оны арваннэгдүгээр сард дарханы зам ашиглалтад орчихно” хэмээн толгойгоороо хариуцаж зогссон нь саяхан. Сайдаасаа гадна авлигын хэрэгт холбогдсон Х.Оргил-Эрдэнэ дарга хүртэл “Удахгүй ашиглалтад орно” гэж улс даяар зарлаж байсан ч хэлсэн ярьсан нь ёстой “нохойн жогорхой” болсон. Бодит байдал дээр Дарханы зам ашиглалтад орох нь байтугай шороон замаа бүрэн тэгшлээгүй, хугацаандаа амжихгүй, он дамнан хойшлогдсон. Ард түмнийг “юу ч бичиж болох цагаан цаас” гэж доромжилсон эдгээр дарга сайдууд “Дарханы зам яав аа” гэсэн хүн бүхэн рүү дунд хуруугаа гозойлгоод “Түй май” гэж нулимах болсон нь тэдний ам, ажлын зөрүү, авилга хээл хахуулийн хэргүүдээс тодорхой болсоор байгаа юм.

ДАРХАНЫ ЗАМЫГ АШИГЛАЛТАД ОРУУЛНА ДАНАЙЖ ЗОГССОН САЙД ГУАЙ, ХЭЛСЭН АМАНДАА ХҮРЭЛГҮЙ ХЭЧНЭЭН ЖИЛИЙГ ҮДЭХ ВЭ?

Замын ажил болон санхүүжилтын талаар Зам тээврийн хөгжлийн яамны Төрийн нарийн бичгийн дарга С.Батболдоос зарим зүйлийг тодруулахад “Азийн хөгжлийн банкны санхүүжилт зогссон зүйл байхгүй. Өнгөрсөн жилийн гэрээгээр 2020 оны зургаадугаар сарын 20-нд замын ажлыг дуусгах гэрээтэй. Дарханы чиглэлийн замын эхний хучилтыг ирэх зургадугаар сарын 20-ны өдөр гэхэд дуусгахаар төлөвлөж байгаа. Цаашид зам хучилтаас гадна бусад инженерийн ажлууд хийгдэнэ. Замын ажлыг гүйцэтгэж байгаа аж ахуйн нэгжүүд “хоёр зам зэрэгцэж явах учраас зам дуусгахад төвөгтэй байна” гэдэг асуудлыг тавьж байгаа. Зам тавихаас гадна тэмдэг, тэмдэглэгээ тавьж явна” гэдэг тайлбарыг өгсөн нь сонгуулийн пялдага долоосон үг шиг санагдсаныг үнэндээ хэлэхээс аргагүй болох нь.Дарга нар та бүхэн бэлэн амлаж “Дарханы замын ажил 70 хувьтай” гэнэ үү. Даанч ард түмнээрээ даажигнахын дээдээр даажигнах юм даа, таануус.Хөөрхий ард түмэн бид л эд хөрөнгө, ам насаараа хохировч даапаалж ханахгүй төрийн албаныхны балгаар төмөр хүлгээ сэг болгож байна. Дарханы зам арваннэгдүгээр сард ашиглалтад орно хэмээн данагархан данайж зогссон Б.Энх-Амгалан сайдаа, хэлсэн амандаа эзэн болгэж хэлээ гаргаж байгаад хэлье!Дээрээс тэнгэр, дэргэдээс ард түмэн харж байхад дэмий зүйл гэж булзаж бултаж чадахгүй л байх шүү, Та.

ЗТХЯ АВЛИГА, АЛБАН ТУШААЛ, АЛЛАГЫН ХЭРГҮҮДЭЭРЭЭ АР МОНГОЛДОО АЛДАРТАЙ ЗАРТАЙ БОЛЖ БАЙНА ДАА

Зам, тээврийн хөгжлийн яамны хэд, хэдэн том төсөл өнөөдөр гацаанд орчихсон байгаа. Үүний тод жишээ ХөшигТийн хөндийн нисэх онгоцны буудал. Мөн Дархан-Уул- Улаанбаатар чиглэлийн 204 км замын барилга шинэчлэлтийн ажил юм. Энэ яам авлига, албан тушаалын хэргүүдээрээ зартай. Авлига, албан тушаалын хамгийн ноцтой, хамгийн дуулиантай хэргүүд энэ яамаар л хаяглагддаг болсон гэж хэлж болно. Тухайлбал, ЗТХЯ-ны Замын ашиглалт, засварын хэлтсийн дарга Х.Оргил-Эрдэнэ 2019 оны арванхоёрдугаар сарын 30-нд албан өрөөндөө их хэмжээний юанийн хахууль аваад сууж байхдаа АТГ-ын ажилтнуудад баригдсан. Тэрбээр Улаанбаатараас Дархан-Уул чиглэлийн авто замын нэгдүгээр багц буюу баруун аймгууд руу салах тойргийн уулзвараас Хар модот (52-ын) давааны ар хүртэлх 37.26 км авто замын ажлыг гүйцэтгэж буй БНХАУ-ын хөрөнгө оруулалттай “Хэйлонжиан жиньеи рөүд энд бридж” компанийн эрх бүхий албан тушаалтнаас дээрх хэмжээний хахууль авсан баримт нь хангалттай байгаа. ЗТХЯ-ны Замын ашиглалт, засварын хэлтсийн дарга Х.Оргил-Эрдэнэ үйлдэл дээрээ баригдсан бол өмнө нь түүний удирдах албан тушаалтан болох тус яамны Авто замын бодлогын хэрэгжилтийг зохицуулах газрын дарга Д.Доржханд мөн л эрх мэдлээ урвуулан ашиглаж, хахууль авсан хэрэгт холбогдон яллагдагчаар татагдан, шалгагдаж байгаа юм.