УИХ-ын чуулганы нэгдсэн хуралдаанаар Оюуны өмчийн тухай хуулийн эцсийн хэлэлцүүлгийг хийж байна. Хуулийн төслийг санаачлагч УИХ-ын гишүүн Н.Учрал “Оюуны өмчийн эрхийн хамгаалалтыг Оюуны өмчийн хуулинд илүү тодотгож өгч байна. “Барааны тэмдэг газарзүйн заалтын тухай хууль”, “Зохиогчийн эрх, түүнд хамаарах хууль”, “Барааны тэмдэг, газарзүйн заалтын хууль” гээд энэ гурван хуулиар өмнө оюуны өмчийн эрхийн хамгаалалтын зохицуулалт хийж ирсэн. Энэ удаа Оюуны өмчийн хуулиар оюуны өмчийн байгууллагын тогтолцоог маш ойлгомжтой тодорхой болгож өгч байгаа. Дээрээс нь оюуны өмчийн байцаагчийн эрхүүдийг тодотгож өгнө. Оюуны өмчийн итгэмжлэгдсэн төлөөлөгч гэж хэн байх вэ гэдгийг тодорхойлж өгч байна. Мөн оюуны өмчийн зуучлал гэж ямар үйл ажиллагаа байх вэ гэдгийг тодорхой болгож өгч байгаа. Оюуны өмчийн эрхийн хамгаалалт хийгдчихээд, эдийн засгийн эргэлтэд оруулах үйл явц буюу инновацийн үйл ажиллагаа болгох процесс нь манай улсад орхигдоод байгаа. Тийм учраас 10 тэрбум төгрөгийн зохиогчийн эрхийн гэрчилгээ, 10 тэрбум төгрөгийн барааны тэмдэг, газарзүйн заалт, ашигтай загварууд бүртгэгдсэн байгаа мөртлөө бүртгэлийг хөрөнгө оруулагч талууд мэдээгүйгээс болоод эдийн засгийн эргэлтэд оруулаагүйгээс оюуны өмч айлын шоовдор хүүхэд шиг болчихсон. Оюуны өмчийн салбар өөрөө нэг талаасаа гадаадын хөрөнгө оруулалт орж ирэхэд эрхийн хамгаалалтыг хийж өгдөг, нөгөө талаас эдийн засгийг төрөлжүүлэхэд хамгийн гол түшиц болдог салбар. Тийм учраас өнөөдөр гадаадын хөрөнгө оруулагчид орж ирээд хамгийн эхэнд асуудаг зүйл бол “Та нар манай оюуны өмчийг хамгаалж чадах уу” гэсэн асуулт байдаг. Энэ талаасаа оюуны өмч инновацитайгаа уялдах ёстой. Энэ хууль батлагдвал нэг давуу тал үүснэ. Материаллаг бус бус баялгийг барьцаанд тавих, цаашид энэ хуулиар оюуны хуулийн үнэлгээчид бий болоод эхлэхээр бүтээгдэхүүний загварыг тодорхой мөнгөн дүнгээр үнэлээд эхлэхээр барааны тэмдгийг банкинд очиж барьцаалаад тэндээс зээл авдаг боломж бүрдэж байгаа юм. Энэ хууль батлагдахаас өмнө Улаанбаатар банкин дээр барааны тэмдэг барьцаалан зээл олгодог үйл явц яваад эхэлчихсэн. Энэ юу гэсэн үг вэ гэвэл Н.Жанцанноров гуайн нэг бүтээл оюуны өмчөөр бүртгэгдчихвэл түүнийг нь аваачаад банкинд барьцаалаад эдийн засгийн эргэлтэд оруулах боломж бүрдэнэ” гэлээ.