“Бид уучлахгүй” хөдөлгөөнийхөн ХЗДХЯ-ны Төрийн нарийн бичгийн дарга Г.Билгүүний 51.6 сая төгрөгөөр албан өрөөгөө тохижуулсан талаарх баримтыг дэлгэсэн. Тус хөдөлгөөнийхөн дахин ХЗДХЯ-ны тансаг хэрэглээтэй холбоотой бас нэгэн ноцтой баримтыг дэлгэлээ. Тус хөдөлгөөний тэргүүн Б.Мөнхцэлмэг “ХЗДХЯ 71.5 сая төгрөгөөр хөшиг, 46.4 саяар хурлын чанга яригч авч, хоёр давхрын гэрээ хэлцлийн болон хурлын танхимаа 117,9 саяар тохижуулжээ. Энэ мэдээллийг тус яамны шилэн дансны мэдээллийг нягталж олсон байна.

“Бид уучлахгүй” хөдөлгөөний тэргүүн Б.Мөнхцэлмэгтэй ярилцлаа.

-ХЗДХЯ-ны Төрийн нарийн бичгийн дарга Г.Билгүүнийг 51.6 сая төгрөгөөр албан өрөөгөө тохижуулсан баримтыг Та дэлгэсэн. Мөн орж үзэх гэж ХЗДХЯ-н дээр удаа дараа очсон. Г.Билгүүн даргын өрөөний тохижуулалтыг нь харж чадсан уу?

-ХЗДХЯ-ны Төрийн нарийн бичгийн дарга Г.Билгүүн 51.6 сая төгрөгөөр тохижуулсан албан өрөөг нь очиж үзэх гэж хоёр удаа очсон. Мөн гурван удаа яамны гадаа жагсаал хийгээд Г.Билгүүн даргатай уулзаж чадаагүй. Тохижуулсан албан өрөөг нь ч үзэж чадсангүй. Г.Билгүүн даргатай уулзах гээд очихоор дандаа байхгүй гэсэн тайлбарыг өгдөг.

ХЗДХ-ийн сайд Ц.Нямдорж өрөөгөө хэдэн төгрөгөөр тохижуулсан вэ гэдэг мэдээлэл шилэн дансанд байхгүй байна. Шилэн дансанд Г.Билгүүн даргын мэдээллээс гадна маш олон мэдээлэл тавьсан байна лээ. Тухайлбал ХЗДХЯ 71.5 сая төгрөгөөр хөшиг, 46.4 саяар хурлын чанга яригч авч, хоёр давхрын гэрээ хэлцлийн болон хурлын танхимаа 117,9 саяар тохижуулсан байна.

Энэ их мөнгөн дунд мэдээж Ц.Нямдорж сайдын өөрийнх нь өрөөний тохижуулалт орсон байх. Иймээс Ц.Нямдорж сайдын албан өрөөг үзэх шаардлагыг тавьсан байгаа.

-Төрийн нарийн бичгийн дарга Г. Билгүүн та нартай уулзсан уу?

-Бид нар Г.Билгүүн даргатай уулзаагүй. Энэ дарга нар чинь иргэдтэйгээ уулздаггүй юм байна. Биднийг оруулахгүй болохоор жагсаал хийсэн. Гэтэл төрийн тусгай хамгаалалтынхан цагдаа нартай хамтраад 40-өөд хүний бүрэлдэхүүнтэй хүмүүс ирж баривчилгаа хийж, иргэдийг айлган сүрдүүлсэн.

ХЗДХЯ-ЫН ТӨРИЙН НАРИЙН БИЧГИЙН ДАРГА, ТӨРИЙН ЗАХИРГАА УДИРДЛАГЫН ГАЗРЫН ДАРГЫГ ОГЦРУУЛНА

-Таныг ямар үндэслэлээр баривчилсан бэ?

-Төрийн тусгай хамгаалалттай газар эмх замбааргүй байдал үүсгэж, дайрч орж ажил төрөлд саад учруулсан. Танхайрсан гэдэг үндэслэлээр баривчилж байцаалт авсан. Хуулиар 7-30 хоногийн баривчлах шийтгэлтэй гэсэн. Одоо прокуророос шүүх рүү шилжиж, шүүх шийдвэрээ гаргана. Энэ хугацаанд ахиж очиж ХЗДХЯ-н дээр янз бүрийн асуудал үүсгэх юм бол давтагдсан гээд баривчлах хуулийн заалттай гэж байсан. Баривчилж хорих асуудал хамаагүй. Бид Үндсэн хуулиар олгогдсон эрхийнхээ дагуу жагсаалзохион байгуулсан.

ХЗДХЯ-ныхан хэвлэлээс нуугдаж зугтаж байна. Иргэдийг ч оруулахгүй байна. Иймээс ирэх долоон хоногт жагсаал зохион байгуулна. Шаардлага биелүүлэхгүй байгаа учраас жагсаалаа улам өргөжүүлж Ц.Нямдорж сайдыг огцруулна. Мөн төрийн нарийн бичгийн дарга, төрийн захиргаа удирдлагын газрын даргыг огцруулна.

-ХЗДХЯ-ны албан өрөөнүүдийн тохижилтын талаарх мэдээлэл хүргэж, лайв хийж байхдаа Ц.Нямдорж сайдтай тааралдсан гэж байсан. Тухайн үедээ уулзаж чадаагүй юм уу?

-Уулзаж чадаагүй. Биднийг очих үед Ц.Нямдорж сайд гарч явсан. Дээрэнгүй хандлагаар “Чамтай ярих юм байхгүй” гээд яваад өгсөн. Өчигдөр Ц.Нямдорж сайдад өрөөг нь үзэх шаардлага хүргүүлсэн. Шаардлага хүргэж өгсөн шавийг минь “Хуцдаг халтар вэ, нохойн гөлөг чинь” гэж дарамталсан байсан. Төрийн захиргаа удирдлагын газрын дарга нь намайг “ Чи өөрөө төрд ажиллаж үзээгүй юм шиг. Чи юу вэ” гэж байсан. Хууль зүйн яам иймэрхүү байдлаар бидэнтэй хандаж байна. Бид ийм зүйл дээр хүлцэнгүй байж болохгүй. Ийм зүйл дээр буулт хийгээд байх юм бол цаашид бусад төрийн байгууллага иргэдтэй ингэж хандана.

-Яам руу орох гэж дайрахаас өмнө нь албан хүсэлт гаргасан уу?

-Албан бичгээр хандаж байсан. Хоёр удаа аятайхан очоод буцацгаасан. Гурав дахь удаагаа ч аятайхан очсон. Нэг дарга л гараад ирчихсэн бол бид явчих байсан. Нэг дарга гарч ирээд хэвлэлийнхнийг оруулна гэж хэлчихээд буцаж гарч ирээгүй.

-Цахим орчноор тансаг ширээ сандалны зураг яваад байсан. Тэр мөн юм уу?

-Цахим орчноор яваад байгаа зураг мөн байна уу, биш байна уу гэдгийг нь л нягталж үзэх гээд байна. Гэтэл оруулахгүй нуугаад байгаад болохоор орж харах гээд зүтгээд байна шүү дээ. Иргэдээс мэдээлэл ирж байна. Дарга нар өрөөг үзэх сургаар тавилгаа наашаа цаашаа зөөж байна гэсэн мэдээлэл ирсэн. Үүнийг нягтлахын тулд орж үзэх хэрэгтэй байна.

-Энэ мэдээллийг ХЗДХЯ-ны шилэн дансны мэдээллийг нягталж байхдаа олсон гэж байсан. ХЗДХЯ-наас гадна өөр яамны дарга нарын өрөөний тохижилтын талаар мэдээлэл байгаа гэсэн. Тэр талаар товч мэдээлэл өгөхгүй юу?

-Одоохондоо энэ яаман дээрээ төвлөрөөд явна гэсэн бодолтой байгаа. Бид хуулиас гажууд зүйл шаардаагүй. Ц.Нямдорж, Г. Билгүүн нарын өрөө танхимыг харах хүсэлтийг л тавьж байгаа.

-Ирэх долоо хоногт жагсаал зохион байгуулна гэж байна. Жагсаалаа ХЗДХЯ-ны гадаа зохион байгуулах юм уу?

-ХЗДХЯ-ны гадаа зөвшөөрөл өгөхгүй байгаа. Иймээс Ялалтын талбай дээр зөвшөөрөл авч тэнд цуглаж үзэл бодлоо илэрхийлнэ. Үүний дараа ХЗДХЯ-ны гадаа очиж шаардлагаа нэхэж зогсоно доо. Дарга нар өргөдлөө өгч хариуцлагаа хүлээх ёстой.