Төрийн байгуулалтын байнгын хороо хуралдаж байна.

УИХ-ын гишүүн Д.Эрдэнэбат: “79.2-оор улс төрийн намууд зөвшилцөж байгаад анхдугаар хэлэлцүүлгээр 50+1 ирц хангаж, энэ сонгуулийг хийх нь зүйтэй юм байна гэж дэмжиж санал хураасан. УИХ-ын нэгдсэн чуулганы анхдугаар хэлэлцүүлгээр санал хураалтаар шийдвэрлэсэн асуудлыг гүйцээн боловсруулах нэрийн дор хийнэ гэдэг бол байхгүй асуудал. Хасна гэдэг чинь гүйцээн боловсруулалт биш ээ С.Бямбацогт дарга аа. Битгий мэдэн будил. Би таныг овоо жоохон сийрэг гэж бодсон чинь тэнэгт хязгаар байдаггүй гэдэг байдлаар сууж байна. Бүүр нэг хэнэггүй царайлаад. Ингэж болохгүй. Төр чинь өөрөө хуультай. Үнэмлэхүй олонхоороо “хүчиндээд” бай гэдэг хууль байхгүй. 50+1 гэдэг саналыг хамтраад дэмжсэн бол энэ шийдвэрлэсэн асуудал мөн. Чуулганаар шийдвэрлэсэн асуудлыг унагаах гэж байгаа бол 3/2-ын саналаар байнгын хороо шийдэх ёстой. Үүнийг хэлсний төлөө хууль зөрчсөн гээд байх юм. Эрх баригчдад хууль үнэн бусдад нь хууль байхгүй гээд зарлачихаач. Олонх нь оролцоогүй сонгуульд нэг төлөөлөгч олонхийн санал авахгүйгээр тэр ард түмнийг төлөөлнө гээд та нар бодоод үз дээ. Энийг яаж хүлээн зөвшөөрөх юм бэ? Өөр хэлэх ч юм алга”

УИХ-ын гишүүн С.Бямбацогт: “Би бол дэг сахиулагч, хуралдаан даргалагч. Х.Нямбаатар гишүүнээр ахлуулсан таван гишүүнтэй ажлын хэсэг, СЕХ-ны дарга, нарийн бичгийн дарга тэргүүтэй 10 гаруй хүний бүрэлдэхүүнтэй ажлын хэсэг байж байна. УИХ-ын Тамгын газар, хууль эрх зүйн хэлтэс, Төрийн байгуулалтын байнгын хорооны ажлын алба гээд энэ олон хүмүүс ажиллаж байна. Өгсөн чиглэлийн дагуу энэ асуудал дээр 11 санал хураалгах ёстой гээд ороод ирэхээр би хураалгахгүй гэх эрх надад байхгүй. УИХ-ын чуулганы хуралдааны дэгийн тухай хуулийг сахиулж байна.

Д.Эрдэнэбат: Чуулган дээр унасан саналыг дахиж босгох нь гүйцээн боловсруулалт биш

Төрийн байгуулалтын байнгын хорооны хуралдаанаар дараах зүйлүүд дээр зарчмын зөрүүтэй санал хураалт явууллаа.

6. Төслийн 78 дугаар зүйлийн 78.2 дахь хэсгийг хасах гэсэн ажлын хэсгийн гаргасан зарчмын зөрүүтэй саналыг дэмжье гэсэн томъёоллоор саналт хураалт явуулж, 13 гишүүн оролцсоноос 9 гишүүний саналаар энэ санал дэмжигдлээ.

7. Төслийн 13 дугаар зүйлийн 13.3 дахь хэсгийн Аймгийн төвд гурван мянгаас дээшгүй, нийслэлийн дүүрэгт дөрвөн мянгаас дээшгүй гэснийг аймгийн төвийн сум болон дүүрэгт гурван мянгаас илүүгүй гэж өөрчлөх саналыг дэмжье гэсэн томъёоллоор санал хураалт явуулж, 14 гишүүн оролцсоноос 9 гишүүний саналаар энэ санал дэмжигдлээ.

8. Төслийн 20 дугаар зүйлийн 20.7 дахь хэсгийн 20.6.1, 20.6.2, 20.6.3, 20.6.7-д гэснийг 20.6.1-20.6.6 –д гэж өөрчлөх саналыг дэмжье гэсэн томъёоллоор санал хураалт явуулж, 14 гишүүн оролцсоноос 11 гишүүний саналаар энэ санал дэмжигдлээ.

9. Төслийн 20 дугаар зүйлийн 20.8 дахь хэсгийг хасах саналыг дэмжье гэсэн томъёоллоор санал хураалт явуулж, 14 гишүүн оролцсоноос 10 гишүүний саналаар энэ санал дэмжигдлээ.

10.Төслийн аравдугаар бүлгийн гарчгийн нэрийн жагсаалтаас гэснийг хасах саналыг дэмжье гэсэн томъёоллоор санал хураалт явуулж, 14 гишүүн оролцсоноос 11 гишүүний саналаар энэ санал дэмжигдлээ.

11. Төслийн 28 дугаар зүйлд 28.8 дахь хэсэг нэмэх. 28.8 Авлига, албан тушаалын гэмт хэрэг үйлдсэн нь шүүхээр тогтоогдсон бол нэр дэвшихийг хориглоно гэсэн санал дээр УИХ дахь АН-ын зөвлөлийн дарга Д.Эрдэнэбат үг хэлэв.

УИХ дахь АН-ын зөвлөлийн дарга Д.Эрдэнэбат: “Энэ бас чуулган дээр унаж, шийдвэрлэгдсэн асуудал ш дээ. Гүйцээн боловсруулах чиглэлд хамаагүй шүү дээ. Ингээд хэдүүлээ хууль зөрчөөд л яваад байх уу? Хууль биелүүлэх нь бидний үүрэг. Чуулган дээр унасан саналыг дахиж босгох нь гүйцээн боловсруулах асуудал биш. Ингээд хүчиндээд байх юм уу, Надад хариу өг л дөө” гэлээ.