Засгийн газрын хуралдааны үеэр Монгол Улсын Ерөнхий сайд У.Хүрэлсүх өнөөдөр нэлээд шидрүүхэн мэдэгдэл хийв. Тэрээр “Одоо засаглах цаг иржээ. Ерөөс хаана, хорино, шийтгэнэ гэдэг арга хэмжээ рүү орцгооно. Ингэж гэмээнэ үүсээд буй хүнд нөхцөл байдлыг бид давахаар байна. Иргэн хүн иргэнийхээ үүргийг биелүүлэх ёстой. Тогтоол шийдвэр, захирамжуудыг хэрэгжүүлэхгүй бол хатуу хариуцлага тооц. Улс үндэстний аюулгүй байдлын асуудал яригдаж байгаа тул дүрэм журмыг чанд сахиул. Тиймээс хорио цээрийн дэглэмийг ирэх даваа гараг хүртэл сунгах нь зүйтэй гэж харж байна. Эс тэгвэл хорио цээр тавигдмагц хөдөө, орон нутаг руу золголтоо хийх гээд явцгаана, эмх замбараагүй байдал үүсгэнэ. Ард түмэн бухимдана, дургүйцнэ гэж айх хэрэггүй. Энэ бол нэг буюу хэдэн хүний эрх ашгийн асуудал биш. Хэл ам гарах юм байна, олон түмэн бухимдах юм байна гэсэн асуудал байхгүй. Энэ бол улсын аюулгүй байдалтай холбоотой асуудал” гэлээ.