Дархан-Улаанбаатар чиглэлийн 224 км зам там болоод бүтэн жилийн нүүрийг үзэх гэж байна. Тэр дундаа Төв аймгийн Баянчандмань сумаас Баруунхараа, Хонгор сум хүртэл зам үнэхээр там. Жижиг тэрэгтэй явж байгаа жолооч нар дугуйгаа хоёроос гурав хагалж үйлээ үзэж байна. Заримынх нь бүх дугуй хагараад явах боломжгүй болчихсон зам дээр гар өргөн хэн нэгнээс тусламж гуйгаад зогсож байх нь хэчнээн гунигтай гээч. Энэ л тамын замаас болж амьдралаа залгуулах гээд замд гарсан жолооч нарын машины дотоод эд анги авах юмгүй болж, эд хөрөнгөөрөө хохирсоор л байгаа нь харамсмаар.

Одоо Дарханы замын ашиглалтад орох хугацаа яг хэзээ эсэх нь тодорхойгүй. Улаанбаатар-Дархан чиглэлийн авто замаар өдөрт дунджаар 5800 тээврийн хэрэгсэл зорчдог. Харин амралт зугаалгын үеэр 12.300 тээврийн хэрэгсэл зорчин өнгөрдөг. Харамсалтай нь энэ байдал зам муугийнх биш замын менежментийг буруу хийсэн учраас ийм нөхцөл байдал үүсч байгаа.

Түүнчлэн зам хааж, түр замаар зорчуулсан хугацаанд 16 хүн амь насаа алдаж, 70 орчим хүн гэмтэл, бэртэл авч, маш олон иргэн эрүүл мэнд, эд хөрөнгө, машин, техникээр хохирчээ. Одоогийн байдлаар машин техник хэрэгслээр хохирсон 200 гаруй иргэн байгаа аж. Там болсон энэ замд хохирсон 200 гаруй иргэний 500 мянгаас 40 сая төгрөгийн хохирлыг хэн хариуцаж барагдуулах вэ гэдэг асуулт зүй ёсоор гарч ирж байна. Одоо хүртэл үргэлжилж буй энэ замын байдлаас болж хичнээн иргэд эд хөрөнгөөр хохирохыг бид таашгүй. Авто замын тухай хуулинд хариуцлагын тухай тодорхой заалт байгаа. Монгол Улс хуультай, хуулиа мөрддөг улс орон мөн л юм бол энэ хуулийн заалтыг хэрэгжүүлж, хохирсон иргэдийн хохирлыг барагдуулах л хэрэгтэй.

ЗТХ-ийн сайд Б. Энх-Амгалан 2019 оны арваннэгдүгээр сард Дарханы зам ашиглалтад орно гэж иргэдэд молиго үмхүүлэв

Харин ЗТХ-ийн сайд Б.Энх-Амгалан “2019 оны арваннэгдүгээр сард Дарханы зам ашиглалтад орчихно” хэмээн толгойгоороо хариуцаж зогссон нь саяхан. Сайдаасаа гадна авлигын хэрэгт холбогдсон Х.Оргил-Эрдэнэ дарга хүртэл “Удахгүй ашиглалтад орно” гэж улс даяар зарлаж байсан ч хэлсэн ярьсан нь ёстой “нохойн жогорхой” болсон. Бодит байдал дээр Дарханы зам ашиглалтад орох нь байтугай шороон замаа бүрэн тэгшлээгүй, хугацаандаа амжихгүй, он дамнан хойшлогдсоор өдийг хүрсэн. Бодит байдал дээр ЗТХ-ийн сайд Б. Энх-Амгалан “2019 оны арваннэгдүгээр сард Дарханы зам ашиглалтад орно” гэж иргэдэд молиго үмхүүлсэн.

Молиго үмхүүлсэн сайд Б. Энх-Амгалан “Улаанбаатар хотод бүх хүмүүс машинаа унаж гарч байна. Зарим нь сайн унаж чадахгүй байгаа учраас мөргөлдөж осол аваар гаргаж байгаа. Замын цагдаагаас авсан мэдээллээр зургаагаар мөргөлдсөн машин хоёр гурван тохиолдол байгаа бол, дөрвөөр мөргөлдсөн тохиолдол 10-аад байна. Энэ нь жолоочийн ур чадвар маш муу байгаагийн шинж. Зарим жолооч зуны дугуйтай замын хөдөлгөөнд оролцож, осол гаргаж, хөдөлгөөн хааж байна. Үүнээс гадна манай даатгалын систем болохгүй байгаа. Хоёр машин мөргөлдсөн тохиолдолд жолооч нар зургаа аваад даатгалын байгууллагад өгөөд явдаг байх ёстой. Гэтэл заавал замын цагдаагийн байцаагчаар хэмжилт хийлгэж баталгаажуулалт хийлгэдэг. Хэмжилт хийлгэх гэсээр байтал хоёр гурван цаг болдог. Ингээд Улаанбаатар хотыг тэр чигт нь түгжрэл болгодог. Иймээс зохицуулалт хийх шаардлагатай” гэдгийг хэлж байна. Сайд маань жолооч нарыг буруутгасан ярилцлага өгч байхаар өөрийн хариуцсан салбарын ажилд анхаарах хэрэгтэй болов уу.