Өчигдөр буюу тавдугаар сарын 27-нд Үндэсний цэцэрлэгт хүрээлэнгийн ойролцоо өсвөр насны дөрвөн хүүхэд усан халианд тоглож байгаад амь насаа алдсан харамсалтай хэрэг гарлаа. Үүнтэй холбоотой баримтууд болон эх сурвалжийн мэдээллийг Мэдээ.мн хүргэж байна.

ХОТЫН ДАРГА АСАН Э.БАТ-ҮҮЛ ГАЗАР АШИГЛУУЛАХ ЗӨВШӨӨРЛИЙГ ОЛГОЖЭЭ

Үндэсний цэцэрлэгт хүрээлэнгийн ойролцоох тус газар нийтийн эзэмшлийн харъяа газар байсан уу гэдгийг Нийслэлийн мэргэжлийн хяналтын газрын дарга Л.Эрдэнэчулуунаас тодруулахад, “Үндэсний цэцэрлэгт хүрээлэнд анх 2014 оны дөрөвдүгээр сарын 4-ны өдөр Хотын дарга асан Э.Бат-Үүл газар ашиглуулах зөвшөөрлийг олгосон. Уг зөвшөөрлийн хүрээнд 2014 онд “Хан талст” ХХК-д 3,3 га газар ашиглах зөвшөөрлийг олгосон байдаг. Тус цэцэрлэгт хүрээлэнд өнөөдрийг хүртэл найман удаагийн хяналт шалгалтыг зохион байгуулсан. Шалгалтын явцад уг компанид олгосон газар ашиглуулах зөвшөөрөл олгох тухай албан тоотын хүрээнд “Хан талст” ХХК, Монголын байт харвааны өгсөн газрын асуудал байдаг. Үндсэндээ “Хан талст” ХХК 3,3 га газарт наран шарлагын цогцолборыг барих төслийг хэрэгжүүлэх зорилготой зөвшөөрөл авсан. НМХГ-аас АТГ-т хандан Үндэсний цэцэрлэгт хүрээлэнд 3.3 га газрыг хувийн компанид олгосон нь хууль бус байна. Газрын тухай хуулийн 35.1.6, Төрийн болон орон нутгийн тухай хуулийн 27.1, Авлигын эсрэг хуулийн 7.1.3, 7.1.6 гэсэн заалтуудыг тус тус зөрчсөн болохыг мэдэгдэж, албан тоот хүргүүлсэн байдаг. ҮНДЭСНИЙ ЦЭЦЭРЛЭГТ ХҮРЭЭЛЭН ДЭЭР ЯМАР НЭГЭН ХЭЛБЭРЭЭР ХУВИЙН КОМПАНИУДАД ГАЗАР ОЛГОХ, ЭЗЭМШИХ ЗӨВШӨӨРӨЛ ОЛГОЖ БОЛОХГҮЙ гэдэг албан тоотыг 2018 онд АТГ-д хүргүүлсэн” гэлээ. Үүнээс дүгнэхэд Нийслэлийн мэргэжлийн хяналтын газар зохих ёсны шаардлагыг удаа дараа Авлигатай тэмцэх газарт хүргүүлсэн ч хууль ёсны шаардлагын хариуд тодорхой шалгалт хийлгүй өдий хүрчээ. Нэг үгээр АТГ ажлаа хийсэнгүй.

ХАРИУЦЛАГА НЭХЬЕ!: Үндэсний цэцэрлэгт хүрээлэнгийн захирал асан Б.Саранчимэг хууль зөрчсөн үү?

Нийслэлийн мэргэжлийн хяналтын газраас Үндэсний цэцэрлэгт хүрээлэнгийн газарт ямар нэгэн хэлбэрээр хувийн компаниудад газар олгох, эзэмших зөвшөөрөл олгож болохгүй, энэ нь Газрын тухай хуулийн 35.1.6, Төрийн болон орон нутгийн тухай хуулийн 27.1, Авлигын эсрэг хуулийн 7.1.3, 7.1.6 гэсэн заалтуудыг зөрчсөн болохыг мэдэгдэв. Асуулт байна. Тухайн үед газрын зөвшөөрлийг олгоход шийдвэр гаргах түвшний удирдлага, Үндэсний хүрээлэнгийн захиралаар одоогийн УИХ-ын гишүүн Б.Саранчимэг ажиллаж байв. Ногоон байгууламжийн газрыг ашиглуулах шийдвэр гаргаагүй бол өсвөр насны хүүхдүүдийн амь нас эрсдэх харамсалтай нөхцөл байдал үүсэх байсан уу. Хариуцлага нэхэж, дахин асууя.

БАРИМТ-1:

УИХ-ын гишүүн Б.Саранчимэг Хүрээлэнгийн захиралаар ажиллаж байх үед /2015 онд ажлаа хүлээлгэн өгсөн/ тус цэцэрлэгт хүрээлэнгийн 3.3 га газрыг ашиглуулах /ӨӨРИЙН ЭЗЭМШЛИЙН ГАЗРЫН ЗАРИМ ХЭСГИЙГ АЖ АХУЙН НЭГЖИД АШИГЛУУЛАХ ГЭРЭЭ/ байгуулжээ. Гэрээний нөхцөлд наран шарлагын иж бүрэн цогцолбор барихаар тусгаж, газрыг зориулалтын дагуу ашиглах тухай харилцан тохиролцож гэрээ байгуулсан байгааг харж болно. Түүнчлэн газар ашиглуулагчийн эрх үүрэгт гэрээнд заасан зориулалтын дагуу газрыг ашиглаж байгаа эсэхийг Б.Саранчимэг хянах ёстой байв. Энэ бол ноцтой алдаа.

Хэрэв зүй ёсоороо наран шарлагын газар байгуулагдсан бол өнөөдөр өсвөр насны дөрвөн хүүхэд эрүүл, саруул байх байлаа. Тухайн үед газар ашиглуулах гэрээ байгуулсан Үндэсний цэцэрлэгт хүрээлэнгийн захирал асан Б.Саранчимэгээс дөрвөн бяцхан үрсийн амь болоод хариуцлагыг нэхэж байна!

БАРИМТ-2:

НЭМЭЛТ: Хэргийн газар ажилласан албаны эх сурвалжууд юу гэв?

Цагдаагийн ерөнхий газрын урьдчилан сэргийлэх хэлтсийн ахлах мэргэжилтэн Цагдаагийн хошууч Х.Хатанбаатар: “Цагдаагийн байгууллага үзлэг шалгалт хийж байна. Өсвөр насны 11 хүүхэд Үндэсний цэцэрлэгт хүрээлэнгийн ойролцоох усан халианд сэлэхээр очсон бөгөөд дөрвөн хүүхэд живж нас барсан. Нөхцөл байдлыг шалгаад дэлгэрэнгүй мэдээлэл өгнө. Нас барсан хүүхдүүдийн хоёр нь нэг айлын хүүхдүүд байсан” гэлээ.

“Нийслэлийн мэдээ” энэ талаар “Маршалын гүүрнээс зүүн тийш Улиастайн гүүр хүртэлх дугуйн зам дагуу дугуйн замын үйл явцтай ирж танилцах үедээ уг барилгын компанид Нийслэлийн засаг дарга шүүмжлэлтэй хандсан. Тодруулбал, дур мэдэж газар ухсан, анх хэлэхдээ цөөхөн объект барина хэмээн зөвшөөрөл авсан байдаг боловч том барилгууд барьсан нөхцөл байдалтай байгаа учраас ажлын хэсэг оруулж, шалгуулна гэж байсан. Үүний дагуу ажлын хэсэг орж шалгасны дараа тавдугаар сарын 20-нд зөвлөлийн хуралдаанд ажлын хэсгийн нарийн бичгийн дарга мэдээлэл танилцуулахдаа уг компани Газрын тухай хууль, Ойн тухай хууль, Усны тухай хуулийг зөрчсөн учир хариуцлага тооцох, арга хэмжээ авах, Үндэсний цэцэрлэгт хүрээлэнгийн даргыг чөлөөлөх асуудлыг ярьсан. Уг барилгын хэсгээс цааш 500 орчим метрийн зайд усан халиа бий. Уг усан халианд харамсалтай нь дөрвөн хүүхэд амь насаа алдсан харамсалтай хэрэг гарсан байна. Эдгээр хүүхдүүд Дэнжийн 1000-аас ирж, усан халиан дээр хөөсөнцөр тавин сэлж тоглож байхдаа эндэж, амь насаа алдсан маш харамсалтай гарз тохиолоо. Арга хэмжээ авах ёстойг хэлж сануулсаар байтал ийм үйл явдал болсонд эмгэнэл илэрхийлье” гэлээ.