УИХ-ын гишүүн Б.Бат-Эрдэнэ: Хамгийн гол нь нийгэм дэх шударга ёсны үнэлэмжийн асуудал. Нийгэмд шударга ёс тогтоох том ажил байна. Иймд шинээр бүрдсэн Засгийн газар үүнд ихээхэн анхаарал тавьж ажиллахгүй бол болохгүй. Ерөнхий сайд тэргүүлж байгаа учраас сайн мэдэж байгаа гэж бодож байна. Хамгийн түрүүнд ашиг сонирхлоос ангид байх ёстой. Энэ зөвхөн Засгийн газрын гишүүдэд хамааралтай биш. Төрийн өндөр, дээд албан тушаалтнууд, УИХ-д хамаатай. Төрийн албыг төрлийн алба болгодог, эхнэр, нөхөр, үр хүүхдээ албан тушаалд тавьж, дарга болгодог, өөрсдийнхөө хамаарал бүхий компаниар төсөл, тендэр авдаг, сангуудын хөрөнгө, мөнгийг нь авдаг асуудалтай хатуу тэмцэх ёстой. Засгийн газрын үйл ажиллагаа өмнө нь буруу замаар явж ирсэн. Ялангуяа шударга ёс, нийгмийн баялгийн хуваарилалттай холбоотой. Өвөг дээдсээс үлдээсэн баялгийг хэн мэдээлэлд ойрхон байгаа нь 30 жилийн хугацаанд лиценз хэлбэрээр аваад завшсан. Ард түмэн байгалийнхаа баялагт эзэн байх эрхийг нь баталгаажуулж өгмөөр байна.