Монгол банк арга хэмжээ авч чадахгүй байна. Хадгаламж эзэмшигчийн эрхийг хамгаалж байгаагаас зээлдэгчийн эрх ашгийг хамгаалахгүй байгаа, гадны банк оруулах цаг болсон

Зээлээ эргэн төлөх боломжгүй орлого олохгүй хөл хорионд орсон иргэд маш их байна. Энэ хүнд цаг үед Монгол банк зохицуулалт хийх боломж байгаа юу хэмээн УИХ-ын гишүүн Ж.Мөнхбат хөндлөө. Мөн тэрээр хэлэхдээ, хэдхэн хадгаламж эзэмшигчийнхээ эрх ашгийг хамгаалж байгаа бодлого явж байгаагаас биш зээлдэгчийн эрх ашгийг хамгаалсан бодлого алга. Дандаа банкны эрх ашгийг ярьж байна. Ядаж энэ хөл хорионы үед зээлийн хүүг тэглэх боломж байдаггүй юм уу. Мөн гадны банк оруулж ирнэ гэсэн асуудал яасан бэ. Б.Баттөмөр гишүүнээр ахлуулсан ажлын хэсэг нилээн сайн ажиллаж байсан. Одоо монголчууд хэдхэн арилжааны банкнуудаа бодсоор байтал иргэд туйлдаж дууслаа хэмээн УИХ-ын гишүүн Ж.Мөнхбат нэмж хэллээ. Түүний хөндсөн асуудалд, Монгол банкны тэргүүн дэд ерөнхийлөгч Г.Дөлгөөн хариулахдаа, Зээлдэгчийн эрх ашгийг хамгаалах асуудлаар эрх бүхий этгээд зээлдэгчтэй байгуулсан гэрээгээр Иргэний хуулиар харилцаа зохицуулагдаж байгаа гэв. Бид чиглэл өгч ярилцаж байгаа гэсэн үгээр гишүүний амыг таглав.

Энэ хурлын үеэр УИХ-ын гишүүд банкны нөхдүүд ямар даам гарсан, том толгойтой нөхдүүд гэдгийг мэднэ. Монгол банк арга хэмжээ авч чадахгүй байна. Хэдий болтол арилжааны банкны үгээр явах вэ. Төр арилжааны банкуудад хүнд хэцүү цаг үед байнга туслаж ирсэн. Гэтэл ард түмэн туйлдсан цагт арилжааны банкнууд ийнхүү иргэдээ бодохгүй байгаа тул одоо төр төмөр нүүрээ харуулж захиргаадалтын арга хэмжээ авах хэрэгтэйг гишүүд анхаарууллаа.

Монголд нийт хадгаламж эзэмшигчдийн 20-30 хувь нь 1 тэрбумаас дээш төгрөгийн хадгаламжтай байна

Монгол банк хүчгүй байна гэдэг нь харагдсаар байна. Учир нь Улсын Ерөнхий сайд нь үүрэг өгсөн, УИХ-ын дарга ажлыг хэсэг байгуулсан. УИХ-д дийлэнх олонх болсон МАН-ын гишүүд өдөр бүр шахуу зээлийн хүүг хойшлуулах биш тэглэх ёстойг анхааруулж Монгол банкыг ташуурдсаар байгаа. Гэтэл Монгол банк ипотекийн зээлээс бусдыг нь бол чадахгүй, "Май" гэснээс өөрцгүй хариу өгсөөр долоо хоногийг үдлээ. УИХ-ын гишүүдийн шүүмж ч чангарч байна. Эцэс сүүлдээ төр төмөр нүүрээ харуулах цаг болсныг хүртэл анхааруулж байгаа. Үнэхээр арилжааны банкууд гэртээ хөл хорионд ороод арилжаа наймаа эрхэлж өдрийн орлогоо олох чадамжгүй болсон иргэдээ огт бодохгүй зээлийн хүүгээ тэглэх боломжгүй гэсэн байр сууриндаа зогссоор байна. Мөн хүчгүйдсэн, үнэгүйдсэн Монгол банк харин одоо хүн бүрийн амыг ганц өгүүлбэрээр хааж эхэллээ. Тэд ам нээх болгондоо, зээлдэгч банктай гэрээ байгуулсан тул энэ харилцаа иргэний хуулиар зохицуулагдана гэж газар ширтэн ярьдаг болов. Ямартаа ч УИХ-д ард түмний итгэлийг олж сонгогдсон МАН-ын 62 гишүүний хүч чадал, Ерөнхий сайд У.Хүрэлсүхийн үг хир жинтэй бас үнэн байдгыг иргэд, ард түмэн одоо харах л үлдлээ.