Вакцин бүр өөр өөрийн гэсэн илрэх хариу урвал, шинж тэмдгүүдийг заасан байдаг. Вакцин бүрт улсын хэмжээнд тандалт шинжилгээ хийж байгааг ХӨСҮТ-ийн Дархлаажуулалтын албаны дарга О.Дашпагма ЭМЯ-ны ээлжит хэвлэлийн хурлын үеэр мэдээлэв.

Тухайлбал, “Астразенека” болон “Вероселл” вакцин тариулсан хүмүүсийн хэдэн хувьд шинж тэмдэг илэрч байгааг тандсан байна. Ингэхэд “Вероселл” вакцин хийлгэсэн хүмүүсийн 10-20 хувьд халуурах, толгой өвдөх зовуурь илэрчээ. Харин “Астразенека-гийн вакцин хийлгэсний дараа нийт тариулсан хүмүүсийн 50-60 хувьд эдгээр шинж тэмдэг илэрсэн байна. Эдгээр шинж 1-2 хоногийн дараа өөрөө аяндаа арилах бөгөөд ихэнх вакцины урвал богино хугацаанд буюу 30 минутын дотор илэрч байгаа аж.

ХӨСҮТ-ийн Дархлаажуулалтын албаны дарга О.Дашпагма энэ үеэр хүн амыг өргөнөөр дархлаажуулж буй вакцин Бээжин болон Ухань хотод үйлдвэрлэсэн, ялгаатай гэсэн иргэдийн дунд гарч буй мэдээлэлд тайлбар өгсөн юм. Монгол Улсын хэрэглэж байгаа “Вероселл” вакциныг Бээжингийн биологийн инститэд бүтээсэн, “Сенофарм” үйлдвэрт үйлдвэрлэсэн. Вакцины хувьд савлалт нь ялгаатай, нэг нь тариуртай хэлбэрээр, нөгөөх нь фалконд нэг тунгаар савласан. Манай улс фалконд савласан, нэг тунтай вакциныг хүлээн авч иргэдээ дархлаажуулж байгаа гэдгийг тэрбээр тодотгосон юм.