“Алсын хараа-2050” Монгол Улсын урт хугацааны хөгжлийн бодлого, Засгийн газрын тогтоол, Эрүүл мэндийн сайдын тушаалын дагуу Цэргийн төв эмнэлгийн Урьдчилан сэргийлэх үзлэгийн байрыг Эрт илрүүлэг, урьдчилан сэргийлэх үзлэгийн байр болгон өөрчилж Эрүүл мэндийг дэмжих төвийг байгуулжээ.

Ингэснээр Цэргийн төв эмнэлгийнхэн энэ сарын 1-ний өдрөөс эхлэн Зэвсэгт хүчний нэгтгэл, ангийн бие бүрэлдэхүүн, анги салбаруудад бүртгэлтэй, чөлөөнд гарсан ахмад настан, дайчид, Баянзүрх дүүргийн IX хорооны 18 наснаас дээш бүх иргэнд эрт илрүүлэг, урьдчилан сэргийлэх үзлэг, оношилгоо, шинжилгээг суурин болон явуулын амбулатори хэлбэрээр хийнэ.

Ташрамд дуулгахад, Өвдсөн нэг хүний эмчилгээнд 11.2-12.3 сая төгрөг зарцуулдаг бол эрт илрүүлэх үзлэг, шинжилгээ, оношилгоонд иргэн бүрийг жилд нэг удаа бүрэн хамруулснаар нэг хүнд 150 мянган төгрөг зарцуулах тооцоолол гарчээ.