АНУ-ын Ерөнхийлөгч Жо Байден БНХАУ-ын дарга Ши ЖиньПинтэй өнгөрсөн Пүрэв гарагт 2 цаг гаруй утсаар ярилцсан байна. Тэдний ярианы гол сэдэв Хятад-Тайваний асуудал байсан юм. Мөн хоёр улсын удирдагчид нүүр тулан уулзах нь ач холбогдолтой хэмээн санал нэгдэж, ийм уулзалт зохион байгуулах боломжийг судлахаар болжээ.

Ж.Байден, Ши Жиньпин нар Тайванийг тойрсон асуудлаас гадна Украины нөхцөл байдал, мөн хоёр талын болон олон улсын зарим асуудлыг хэлэлцжээ. Энэ үеэр БНХАУ-ын дарга Ши ЖиньПин АНУ-ын Ерөнхийлөгчид хандан, “Тайваны асуудал дээр галаар тоглосон хэн бүхэн шатах болно. АНУ-ын тал үүнийг ухамсарлаж байгаа байх хэмээн хэлсэн гэж Хятадын төв хэвлэлд мэдээллээ.

Жо Байден АНУ-ын Ерөнхийлөгчөөр сонгогдсноос хойш ийнхүү тав дахь удаагаа тэд утсаар ярилцсан нь энэ байв. АНУ-ын Ерөнхийлөгч Жо Байден өөрийн твиттер хуудаснаа, Хятадын даргатай уулзсан уулзалтаа зургаар баталгаажуулан оруулсан байна. АНУ-ын Конгрессын Төлөөлөгчдийн танхимын дарга Нэнси Пелоси Тайваньд айлчилбал Хятадын эрх баригчид эрс шийдэмгий, хатуу арга хэмжээ авна гэж тус улсын Гадаад хэргийн яамны албан ёсны төлөөлөгч Жао Лизянь мөн мэдэгдлээ. Тэрээр хэлэхдээ, "Хятад улс АНУ, Тайванийн хооронд аливаа албан ёсны харилцаа тогтоохыг бид эрс эсэргүүцэж байна. Конгресс бол Америкийн төрийн аппаратын нэг хэсэг бөгөөд энэ нь АНУ-ын баримталж буй "Нэг Хятад" бодлогыг хатуу дагаж мөрдөх ёстой гэсэн үг юм" гэж цохон тэмдэглэжээ.

“Хэрэв Пелоси Тайваньд айлчилбал тэрээр “Нэг Хятад” зарчим болон Хятад-Америкийн тохиролцоог шууд зөрчинө. Хэрэв АНУ өөрийн үзэмжээр үйл ажиллагаа явуулах юм бол бид улсынхаа тусгаар тогтнол, нутаг дэвсгэрийн бүрэн бүтэн байдлыг хамгаалахын тулд шийдвэртэй, үр дүнтэй арга хэмжээ авахаас өөр аргагүй болно. Үр дагаврын хариуцлагыг Вашингтон хүлээнэ” гэсэн байна.