Монгол Ардын Нам төрийн албыг оймс, дотоожны наймаачид шиг л солилцож байна. Засгийн газар солигдох нь уг нь хариуцлага хүлээх хэлбэр байсан бол энэ удаа зүгээр л дээр нь байсан нь доор нь орж байгаад заваарцгаах нь. Нэгэнт эрх ашгийн эрэмбэ ил цагаан алдагдаж, увайгүй улс төрчид намынхаа суганд лав шигдэж, даргыгаа мөлчийтөл долоож, тохироонд орцгоож “үхэхийн өмнө үхэр буугаа тавина” гэдэг шиг ямар ч хамаагүй яам, агентлагт, ял зэмээ далдалж, янз бүрийн аргаар шургацгаагаад л...

Монгол Улсын эдийн засгийн алс хэтэд хэрэгтэй чухал яам, тамгын газруудад салбараа мэдэхгүй хэрнээ зүгээр л “сайд, “дарга” гэгдэж эрх, ямба эдэлцгээхийг хүсэгчид ээлжээ сольж, засгийн газрын бүтэц угаагүй удсан хиртэй ор хөнжлийн даавуу шиг үнэлэгдэж, засрашгүй хулгайчдын замаа засч, хөрөнгөө зузаалах дэвсгэр нь болжээ.

Хариуцлага гэдэг ойлголт ор тас мартагдав. Үндсэн хууль, Засгийн газрын тухай холбогдох хууль тогтоомжуудыг дураараа өөрчилж, хуулиар хангагддаг ард түмний төрийн эрх мэдэлд оролцох эрх албан тушаалын төлөөх эцэс төгсгөлгүй орилоон, цамнаанд ор мөргүй боллоо. Товчхондоо тэд нэг намын засаглал буюу авторитар дэглэм тогтоочихлоо. Энэ бол солиорол төдийгүй гэмт хэрэг.

МАН-ын загалмайлсан эцэг Намбарын Энхбаярын хүү хүртэл дарга болохоо мартсангүй. Засгийн газрын дан дээлтэй сайдууд цөм ямар нэг газрын дарга болцгоолоо.

Зам тээврийн сайд асан Л.Халтарыг тус яамны дэд сайдаар, Хүнс хөдөө аж ахуй хөнгөн үйлдвэрийн сайд асан З.Мэндсайханд Эрдэнэбүрэнгийн УЦС-ын төсөл хариуцуулахаар томилжээ. Цахим хөгжил харилцаа холбооны яамны Төрийн нарийн бичгийн дарга Б.Болор-Эрдэнийг тус яамны дэд сайдаар, харин түүний оронд н.Золбаярыг томиллоо. Мөн Эрчим хүчний сайд асан Н.Тавинбэхийг тус яамны Төрийн нарийн бичгийн даргаар томилов. Үүнээс гадна Уул уурхай хөнгөн үйлдвэрийн төрийн нарийн бичгийн даргаар Х.Бадамсүрэн, Уул уурхайн сайд асан Г.Ёндонг "Эрдэнэт" үйлдвэрийн захирлаар томилжээ.

Энэ мэтээр улсын аль л ашигтай, мөнгө олдог чухал газруудад сэлгээ хийгдсэн ч сэнтийд суугчид нь цэвэршсэнгүй. МАН-ын гишүүн дарваан хар хочит Цогтгэрэл: 67 настай Бадамсүрэнг томилсон томилгоог Үндсэн хуулийн цэцэд хандах гэтэл Цэцийн дарга Чинбат 67 настай байгаад байх юм. Тэтгэвэртээ гараачээ... гэсэн нь МАН-ын эмх замбараагүй хэрнээ, цус ойртож бүлэгнэсэн, мөнгөний томилгоонуудын цаана хэдэн хөгшин ах нар нь хөшигний араас хуруугаараа дохиод л сууцгааж буй бололтой. Улсын төсвийн ихэнхийг бүрдүүлэг Эрдэнэтийн захирал Х. Бадамсүрэнг гомдоовол хэрэг бишдэх тул ингэж ч байж мэдэх. Үндсэн хуулиа удаа дараа уландаа гишгэснээс эхлээд л төрийн завхрал хүнд өвчлөлийн хэлбэр лүү гулдайсан. Хатанбаатар ван Магсаржав МУСК: ... араа даах л юм бол ялаа батгана шиг арзаганаж л бай... гэдэг шиг хууль журам, төрт ёсыг мартаж МАНсруурсан эрх мэдэлтнүүд түүхэн үйлийн үрийг яаж аргалах юм бол доо?