Кувейтийн мэдээний нэгэн вэбсайт хиймэл оюун ухаан ашиглан виртуал хөтлөгч бүтээсэн байна. Олон нийтэд түүнийг танилцуулах ажиллагаан дээр уг виртуал хөтлөгч “Намайг Федха гэдэг. Би хиймэл оюун ухаанаар бүтээгдсэн Кувейтийн анхны мэдээний хөтлөгч. Та нар ямар төрлийн мэдээ сонирхож байна? Та нарын саналыг сонсъё” гэж хэлсэн 13 секунд үргэлжилсэн энэхүү танилцуулга Кувейтийн нийгмийн сүлжээний гол сэдвүүдийн нэг болсон байна. Хиймэл, виртуал хөтлөгч ташаа мэдээлэл түгээж болзошгүйгээс гадна яваандаа хүний ажлын байрыг орлох аюултай гэж иргэд шүүмжлэлтэй хандаж байгаа аж.

Хар пиджак өмсөн, толгойдоо алчуур зүүгээгүй шаргал үст Федха нэртэй эмэгтэй хөтлөгчөөр ирээдүйд цахим мэдээ уншуулахаар төлөвлөж байгаа аж. Федха гэдэг нь эртний Кувейтээр мөнгө гэсэн утгатай бөгөөд роботыг мөнгөлөг, металлаар хийдэг учир роботтой адилтгаж хөтлөгчийг Федха гэж нэрлэсэн гэнэ.