“Улаанбаатарын иргэд агаарын бохирдол буурсан гэж баярлах нь үхлээ алга ташиж угтсантай ялгаагүй. Хятадууд ч тоож авахгүй байгаа МCS буюу Энержи ресурсийн баяжуулан угаасан нүүрсний нуль хортой хаягдлыг шахмал түлшний үндсэн түүхий эд болгож ашиглахаар ямар олигтой байхав. Үнэн хэрэгтээ тэд хаягдал асгасан нүүрс олборлох талбайгаа суллахдаа буянт эзний дүр үзүүлж байна. Гор нь тун удахгүй ээ. Нийслэлд өвлийн цагт юу ч түлсэн утаа дийлдэхгүй . Дахин дахин хэлэхэд зүгээр л байгалийн хүчээр буюу Чингэлтэй,Баянзүрх, Богд уулыг асар том сэтэлж агаар салхины урсгалыг чөлөөлөх хэрэгтэй.”

Энэ бол 2021 оны 12 сард иргэний фейсбүүктээ бичсэн нийтлэл. Харин яг энэ үеэр эрх баригч нарын зүгээс нүүрсний утаа 50 хувь буурлаа хэмээн шоудсаар сонгуулийн ялалт авсан баяр хөөр нь дарагдаагүй байсан.

Харин өдгөө агаарын бохирдлоос үүдэн нялх балчир үрс уушгины өвчнөөр хорвоог орхиж, хорт хавдрын хэмжээнд хүрсэн тахлаас ч аюултай орчин нөхцөлд Монгол Улсын хүн амын тал хувь нь амьдарч байхад ҮАБЗ нүдэн балай чихэн дүлий өнгөрүүлсээр байх уу?

Дэлхийн хамгийн их утаатай хотын жагсаалтыг БНХАУ-ын Ухань хот тэргүүлж байгаа бол, Бангладеш улсын Дакка хот хоёрдугаарт, Энэтхэгийн Дели хот гуравдугаарт Монгол Улсын нийслэл Улаанбаатар хот дөрөвт багтаж байна. Өөрөөр хэлбэл хүн амьдрах бололцоогүй хортой, нэн аюултай нөхцөл байдлыг манай улс ийнхүү хошуучилж байна.

Д.ЭНХБАТ