Эрх баригчид авлигатай амжилттай тэмцэж, эдийн засаг өсөж байгаа учраас ирэх жилүүдэд тэднийг сонговол том бүтээн байгуулалтын ажил өрнөн улс орон түүхэн хөгжлийнхөө замд эргэлт буцалтгүй орно гэж сонгууль угтан сурталдах бололтой. Гэтэл ачир дээрээ авлигалын хар сүүдэр арилах болоогүй, хулгайч нар төрд нөлөөтэй хэвээр төдийгүй Ерөнхий сайд “мафийн тогтолцоо шүүхийн байгууллагыг эрхшээж” байгааг өөрийн амаар нотолсон. Авлигал буураагүй учраас ажилгүйдэл ядуурал арилах болоогүй гэдгийг ардчиллын үзүүлэлтийг судлан тогтоодог олон байгууллагууд дүгнэсээр. Шударга бус тогтолцоотой тэмцэж байгаа гэх нэрийдлээр ардчиллын үнэт зүйлсийг уландаа гишгэн дарга ангийн дураараа авир хэрээсээ хэтэрчээ. Олон нийтийн эрх ашгийг нэг албан тушаалтны сэтгэл хөдлөлөөр шийдвэрлэж, түүнийгээ намынхаа нэр хүндийг өсгөх хэрэгсэл болговол төр гэх үндсэн ойлголт байхгүйг илтгэнэ. Эдийн засгийн өсөлт тоон утгаараа нэмэгдэж байгаа ч эндээс улс төрчдийн халаасанд орж тэдний гэр бүлийг тэжээдэг зардал төсвийн төсөөллийг улам л хүнд шархдуулсаар.

Д.ЭНХБАТ