Нийгмийн хөгжилд эрэгтэйчүүдийн оролцоо, манлайлал” үндэсний II чуулган Төрийн ордонд Ерөнхийлөгчийн ивээл дор болж өндөрлөв. Монгол Улсын Ерөнхийлөгч У.Хүрэлсүх чуулганыг нээсэн илтгэлдээ “...эрчүүд эмэгтэйчүүдээс 10 шахам жилээр богино насалж, хоёр эрэгтэй тутмын нэг нь тамхи татаж, архи уудаг, түүн дотроо эрэгтэйчүүдийн 29 орчим хувь нь сар бүр хэтрүүлэн хэрэглэдэг гэсэн судалгаа байна. Үүнээс улбаалж согтуугаар тээврийн хэрэгсэл жолоодох, гэмт хэрэг үйлдэх, осол гэмтэлд өртөх зэргээр өөрийн төдийгүй бусдын эрүүл мэнд, эд хөрөнгийг хохироох явдал их гарч байна.

Зохисгүй хооллолт, хөдөлгөөний хомсдол, архи, тамхины хэрэглээнээс үүдсэн артерийн даралт ихсэлт, хоол боловсруулах замын болон зүрх судасны эмгэг эрчүүдийн дунд түгээмэл байна. Хавдар, осол гэмтэл эрчүүдийн нас баралтын гол шалтгаан болж байна…” Хэмээн эрчүүдэд тулгамдаж байгаа бүх талын асуудлыг шийдвэрлэх аливаа санаачилгыг дэмжихээ илэрхийлсэн юм. Ерөнхийлөгчийн илтгэлд дурдагдсан судалгааны тоо баримтаа зарим нь ихээхэн анхаарал татна.

Тухайлбал Монгол эрчүүд эмэгтэйчүүдээс 10 шахам жилээр богино насалдаг мөртлөө тэтгэвэр авах насны доод хязгаар нь эмэгтэй 60, эрэгтэй 65, малчин эмэгтэй 50, эрэгтэй 55 нас байх жишээтэй. Монгол Улсын Ардчилсан Үндсэн хуульд аливаа хүн нас, хүйс, ажил мэргэжил, нийгмийн гарал угсаа гэх мэтээр аливаа жам ёсны байдлаараа хэзээ ч ялгаварлан гадуурхагдах ёсгүй.

Гэтэд нийгмийн хамгааллын бодлого нь яахаараа эр хүнийг эмэгтэй хүнээс ийнхүү 5 жилээр сунгаж тэтгэврийн нас тогтоож байгаад асуулт, асуудлыг дэвшүүлэх цаг болжээ. Эмэгтэй хүн хүүхэд төрүүлж, өсгөн нэг талаар хүн амын өсөлтөд чухал байр суурь эзэлдэг ч хөдөлмөрийн үр шимээрээ эрчүүдтэй эн тэнцүү шахам.Тэгш эрхийн зарчим мөрддөг эрх зүйт төртэй ардчилсан үзэл баримтлалтай Монгол Улсад засаж залруулмаар олон асуудлын нэг нь энэ болов уу?