Ардын хувьсгалын 103 жилийн ой Үндэсний их баяр наадмын бөхийн барилдааны үеэр энэ жил шинэчилсэн Төв цэнгэлдэх хүрээлэнгийн зүлэг иргэдийн шүүмжлэлийг дагуулсан. Учир нь бөхийн барилдааны үеэр их хэмжээний усархаг бороо орж, барилдаж буй бөхчүүд зүлгэн дээр хальтирч эхэлсэн. Тодруулбал, учраа бөхдөө биш хөл нь халтирснаас үүдэж харамсалтайгаар унасанд тооцогдож даваагаа өгсөн олон бөхчүүдийг наадамчин олон дэргэдээс нь болоод цэнхэр дэлгэцээр харцгаасан.

Эхний өдөр дээрх асуудал хөндөгдөж эхэлсэн ч Монголын үндэсний бөхийн холбоо болон наадмыг зохион байгуулах комисс, Төв цэнгэлдэх хүрээлэнгээс ямар нэгэн арга хэмжээ аваагүй. Мөн тодорхой мэдээлэл огт хийлгүй байсаар наадмын ард гарсан.

Энэ асуудлаар "Төв цэнгэлдэх хүрээлэн" ХХК-ийн захирал Ж.Энхжаргалан "Бидний зогсож байгаа энэ талбайн замыг гүйлтийн олон улсын стандартаар шинэчилж хийсэн. Өмнө нь нэлээд хуучраад муудчихсан байсан. Харин зүлгийг бас л 9 болчихсон байхад нь шинээр тоглолт бас спортын үйл ажиллагаа явуулж хоёр төрлөөр ашигладаг 26 мянган өвсний нягтаршилтайг шинээр тавьсан. Хуучин зүлгийг шагай, сурын талбай руугаа шилжүүлж дэвссэн.

Сур, шагай хоёр дээр асьпалтаа сайжруулсан, сүүдрэвчийг нь сольж, 2.5 метрийн өргөнтэй явган хүний зам тавьсан гэх мэтээр шинэчлэл хийсэн" хэмээн наадмын нээлт эхлэхийн өмнө манай сайтад өгсөн тодруулгадаа дурдсан. Өөрөөр буюу асуудал үүссэнээс хойш мэдээлэл өгөөгүй. Харин наадмын маргааш өөрийн цахим хуудсаараа дамжуулан уучлал хүссэн.

Нээлттэй мэдээллийн сангаас харвал энэхүү хиймэл зүлгийг авахдаа Улаанбаатар хотын захирагчийн ажлын албанаас 629 сая төгрөгийн "Нийтийн эзэмшлийн гудамж шинээр зүлэгжүүлэх" нэртэй тендер зарлажээ. Энэ дүнгийн 500 сая төгрөгөөр Төв цэнгэлдэх хүрээлэнгийн 6400 метр квадрат талбайн зүлгийг худалдаж авсан бол "бусад" гэх нэрээр 1600 метр квадрат талбайд зориулж 129 сая төгрөгөөр зүлэг худалдаж авсан байна.

Уг тендерийг 2024 оны тавдугаар сарын 20-ны өдөр зарлаж "Бат өндөр хайрхан" ХХК гэх компани шалгарчээ. Энэ компанийн хувьд 2017 онд байгуулагдсан бөгөөд Гонгорын Батбаяр гэж хүний нэр дээр бүртгэлтэй байна.

Эргэн сануулахад, наадмын бэлтгэл ажлын үеэр тус зүлгийг БНХАУ-ын "Эй Ви Жи" гэх компаниас авсан гэдгийг албаны хүмүүс хэлж байв. Ингэхдээ тухайн компанийг нь Бээжингийн олимпын спортын цэнгэлдэхүүдийн бүх зүлгийг хариуцан ажилласан хэмээн тодотгосон билээ.

ЭХ СУРВАЛЖ: EGUUR,MN