КИЕВ, 2024 оны наймдугаар сарын 12 /CNN/. Украины өмнөд нутагт байрлах, Оросын хяналтад байгаа Запорожийн атомын цахилгаан станцад /АЦС/ Оросын цэргүүд гал тавьсан гэж Украины Ерөнхийлөгч Владимир Зеленский ням гарагт Телеграм хуудсандаа мэдэгджээ.

В.Зеленский станцын нэгэн цамхгаас их хэмжээний утаа гарч буйг харуулсан дүрс бичлэг нийтэлсэн байна. Цацраг идэвхт бодисын үзүүлэлтүүд хэвийн байгаа гэж тэрбээр хэлсэн боловч АЦС-ыг “Украин болон бүх Европ, цаашлаад дэлхий дахиныг айлган сүрдүүлэх зорилгоор ашиглаж байна” гэж Оросын талыг буруутгажээ. “Дэлхий нийт үүнд ямар хариу үйлдэл үзүүлэхийг бид хүлээж байна, бид Олон улсын атомын эрчим хүчний агентлагийн /ОУАЭХА/ хариу үйлдлийг хүлээж байна. Оросын тал үүнд хариуцлага хүлээх ёстой” гэж тэрбээр хэлсэн байна.

Станцыг ажиглаж буй Никополь дүүрэг дэх Украины хяналтад байдаг цэргийн захиргааны дарга Евгений Евтушенко хэлэхдээ, Оросын цэргүүд хөргөх цамхгууд дотор олон тооны автомашины дугуй шатаасан гэх албан бус мэдээлэл байна гэжээ. Тэрбээр үүнийг “өдөөн хатгалга, эсвэл үймээн самуун үүсгэх оролдлого” гэж нэрлээд, станц “одоогийн нөхцөлд байдалд байж болох хэвийн түвшинд ажиллаж байгааг” баталжээ.

Харин Оросын тал тус станцын нутаг дэвсгэрт гал гарсан явдалд Украиныг буруутгасан байна. ОХУ-аас томилогдсон, Запорожийн эзлэгдсэн хэсгүүдэд хяналт тавих асуудал эрхэлсэн төлөөлөгч Е.Балицкий мэдэгдэхдээ “Украины зэвсэгт хүчин Энергодар хот руу их буугаар буудсаны улмаас гал гарсан” гэжээ. Тэрбээр мөн атомын станц болон Энергодар хотод цацрагийн аюул байхгүй" гэж нэмж хэлсэн байна.

Оросын Засгийн газраас томилогдсон Запорожье мужийн захирагч Владимир Рогов мэдэгдэхдээ "Украинчууд цахилгаан станцад цохилт өгөхийн тулд өөрийн нутаг дэвсгэрээс нисгэгчгүй онгоц хөөргөсөн бөгөөд энэ бол урьдчилан төлөвлөсөн, зориуд санаатай үйлдэл” гэжээ. Оросын ГХЯ-ны хэвлэлийн төлөөлөгч Мария Захарова уг халдлагын дараа Украиныг “цөмийн терроризм”-д буруутгаж, үүнд зохих хариуг өгөхийг ОУАЭХА-т уриалсан байна.

ОУАЭХА энэ үйл явдлын дараа ням гарагт X хуудсаараа дамжуулан мэдэгдэл хийжээ. “Оройн цагаар хэд хэдэн дэлбэрэлт сонсогдсоны дараа Запорожийн станцын хойд хэсгээс хар утаа гарч байгааг ОУАЭХА-гийн мэргэжилтнүүд харсан. Уг хэсэгт байрлах хөргөх цамхгуудын нэг рүү өнөөдөр нисгэгчгүй онгоцоор халдсан гэж станцаас мэдээлсэн. Цөмийн аюулгүй байдалд ямар нэгэн байдлаар нөлөөлөөгүй” гэж тус агентлаг мэдэгджээ.

ЭХ СУРВАЛЖ: МОНЦАМЭ АГЕНТЛАГ