Монголбанкны удирдлагууд өнөөдөр хэвлэлийн хурал зохион байгуулж, Мөнгөний бодлогын хорооноос гарсан шийдвэрийг танилцууллаа.

Бодлогын хүүг нэг нэгж хувиар бууруулж, 10 хувьд хүргэхээр болсон байна. Түүнчлэн нийлүүлэлт, гаднаас шалтгаантай үнийн дарамт хүлээлтээс бага байгааг харгалзан инфляцын энэ оны төсөөллийг бууруулсан аж.

Мөн өнөөдрийн хэвлэлийн хурлын үеэр Монголбанкны Мөнгөний бодлогын газрын захирал Б.Баярдаваа эрчим хүчний төлбөр нэмэгдэхтэй холбогдуулан инфляцад орох өөрчлөлтийн талаар мэдээлэл өглөө.

Тэрбээр "Эрчим хүчний үнийн өсөлттэй холбоотой инфляцад үзүүлэх нөлөөллийг бид тооцоололдоо оруулсан. Инфляцын шинэчилсэн төсөөллөөр ирэх оны дунд үед инфляц өмнөх төсөөллөөс нэмэгдэх хүлээлттэй байгаа.

Үүнд нөлөөлж буй хүчин зүйлсийн нэг нь эрчим хүчний үнийн өсөлт инфляцад нөлөө үзүүлэхээр байна. Засгийн газраас олон нийтэд өгч буй мэдээллийн дагуу эрчим хүчний 30 хувийн үнийн өсөлтийг инфляцын тооцоо судалгаанд оруулсан.

30 хувийн үнийн өсөлт инфляцад 0.8-1 нэгж хүртэлх хувийн өсөлт бий болгоно гэж тооцоолсон. Бидний авч буй мэдээллээр Монгол Улсын эрчим хүчний найдвартай баталгаатай байдлыг хангах стратегийн ач холбогдолтой шийдвэр гэсэн.

Тэгэхээр энэ шийдвэр ямар нэгэн байдлаар гарах юм байна гэж тооцоо судалгаа хийсэн" гэв.