Бүгд найрамдах намын дарга Б.Жаргалсайхан Ерөнхий сайд Л.Оюун-Эрдэнийг дэмжиж байгаагаа илэрхийллээ. Тэрбээр хэлэхдээ “Тийм ээ. Би Оюун-Эрдэнийг дэмжинэ. Энэ миний эрхийн асуудал. Улс төрийн намын тухай хууль /шинэчилсэн найруулга/-ийг дагаж мөрдөх журмын тухай хуульд өөрчлөлт оруулах тухай хуулийн төсөл дээр бид жаахан хугацаа өгчих л гэж байгаа юм” хэмээв.

Б.Жаргалсайхан мөн өнөөдөр Төрийн ордонд улс төрийн намуудын төлөөлөл мэдээлэл хийх үеэр "Төсөв хэлэлцэж байна гэж бужигнаж байгаад хориг тавиулчихсан. Төр засаг нь яая гэж байхад намын хууль нь орж ирэх юм гэнэ. Дандаа далимдуулж аливааг шийдэх арга замтай юм билээ. Гудамжинд байгаа намууд хэнд, ямар муу зүйл хийсэн юм бэ? Нийгмийн болох болохгүйг л шүүмжилж ярьдаг байх.

Мэдээж, юм ярина гэдэг улс төрийн соёл эзэмшихийг хэлж байгаа юм. Улс төр хийнэ гэдэг бол бусдыг дайран гүжирдэж, доромжлох биш. Тиймээс бид Улс төрийн намын тухай хуулийг нэг, хоёр жилээр ч хамаагүй хойшлуулаад, тэр хугацаанд хуулийг хэлэлцье гэж байгаа хэрэг.

Хам хум шийдээд, үндсэндээ биднийг нам биш болгох нь л дээ. Бүгдийг нь байхгүй болгох нь. Энэ явуургүй заль мэхийг мэдэж байна. Тиймээс хуулийг хойшлуулахын төлөө ажиллана.

Бидэнтэй зууралдаж, биднийг хэн ч биш болгоно гэж бодохын оронд наад төсвөө аятайхан хэлэлцэж шийд” гэсэн байр суурь илэрхийлсэн юм.

Б.ЖАРГАЛ