АТГ-ын Мөрдөх байцаах хэлтсийн дарга, УЕП-ын дэргэдэх Мөрдөх байцаах албаны мөрдөн байцаагч, УЕП-ын газрын Ял эдлүүлэх ажиллагаанд хяналт тавих хэлтсийн дарга зэрэг хууль хяналтын байгууллагад томоохон албан тушаал хашиж байсан Сүхбаатар дүүргийн ерөнхий прокурор асан Э.Амарбатад холбогдох хэргийн шүүх хурал өнөөдөр (2025.01.29) 09.00 цагт товлогдсон байна.

Түүнийг авлигын хэрэгт холбогдуулан шалгаж, 2024 оны арванхоёрдугаар сард үүрэгт ажлаас нь чөлөөлсөн.

Э.Амарбатад холбогдох хэргийн талаар прокурорын байгууллагын эх сурвалж “Прокурор гэмт хэрэгт холбогдсон, хуулийн байгууллага шалгаж байна. Авлига, албан тушаалын гэмт хэргээс урьдчилан сэргийлэх чиглэлээр манай байгууллагаас арга хэмжээ авч хэрэгжүүлж байна” гэж мэдээлжээ.

Одоогоос 15 жилийн өмнө Авлигатай тэмцэх газрын дарга Ч.Сангарагчаа Мөрдөн шалгах хэлтсийн дарга Э.Амарбатыг ажлаас чөлөөлөх тухай тогтоолд гарын үсэг зурж байв.

Э.Амарбат Авлигатай тэмцэх газар байгуулагдсан үеэс Мөрдөн шалгах хэлтсийн даргаар ажиллаж байсан. Авлигатай холбоотой том гэгдэх хавтаст хэргүүд түүний ширээгээр дамжиж, шүүх рүү шилжиж байв.

Онцгой байдлын асуудал эрхэлсэн сайд асан С.Отгонбаярт холбогдох хэргийг шалгаж шүүхэд шилжүүлснийх нь дараа Э.Амарбатыг хүчингийн хэрэг үйлдсэн гэх дуулиан дэгдсэнээр тэрбээр олны танил болсон.

С.Отгонбаярын өмгөөлөгчөөр ажиллаж байсан С.Ганчимэг гэдэг бүсгүйг татаж чангаасан гэх хэргээр Улсын ерөнхий прокурорын дэргэдэх Мөрдөн байцаах албанаас хэдэнтээ байцаалт авсан ч гэм буруутайг нь нотолж чадаагүй. Энэ дуулиантай зэрэгцэн Э.Амарбатыг ажлаас нь огцруулах жагсаал Авлигатай тэмцэх газрын үүдэнд болж байсан билээ.

Б.ЖАРГАЛ