Тагнуулын байгууллагаас өчигдөр /2025.02.18/ “MCS” группийн хэлтсийн дарга З.Төрмандахыг баривчилжээ.

Монгол Улсын Ерөнхий сайд Л.Оюун-Эрдэнэ энэ сарын 17-ны өдөр “Стратегийн ач холбогдол бүхий Тавантолгойн чулуун нүүрсний бүлэг ордын ашигт малтмалын тусгай зөвшөөрлийг хувийн хэвшлийн аж ахуйн нэгжид олгосон” талаарх асуудлыг судлахыг үүрэг болгосон.

Улмаар УИХ, Засгийн газрын өмнөх шийдвэрүүдэд дүн шинжилгээ хийж, санал, дүгнэлт боловсруулж танилцуулах үүрэг бүхий Ажлын хэсэг байгуулах захирамж гаргасан. Ажлын хэсгийг Монгол Улсын Хууль зүй, дотоод хэргийн сайд О.Алтангэрэл ахлан ажиллаж буй.

Ажлын хэсэг байгуулагдсаны маргааш буюу хоёрдугаар сарын 18-ны өдөр тус ордыг эзэмшдэг “Эм Си Эс” группийн Харуул хамгаалалтын албаны дарга З.Төрмандахыг тагнуулын байгууллагаас саатуулсан байна.

З.Төрмандахыг өөрсдийн компанийн хамаарал бүхий автомашин, ресторан, уушийн газруудад тагнаж, чагнах төхөөрөмж хууль бусаар суулгаж, гүйцэтгэх ажиллагаа явуулж байсан гэх үндэслэлээр баривчилсан талаар эх сурвалж мэдээлэв. Түүнчлэн энэ хэрэгт нэр бүхий шүүгч нар холбогдох нөхцөл байдал тогтоогдсон талаарх мэдээлэл бий.

З.Төрмандах нь 2010 оноос тус группийн хамгаалалтын албыг хариуцаж ирсэн гэх бөгөөд цагдаагийн байгууллагад ажиллаж байсан, цагдаагийн хурандаа цолтой аж.

Өмнө нь Мөрдөн байцаах газрын дарга, Дотоод хэргийн их сургуулийн тэнхимийн эрхлэгч зэрэг албан тушаал хашиж байсан ба С.Зоригийн хэргийн мөрдөн байцаагчаар мөн ажиллаж байжээ.

Б.ЖАРГАЛ