Засгийн газраас жижиг, дунд бизнес эрхлэгчдийг дэмжих хүрээнд 146 төрлийн үйл ажиллагааг зөвшөөрлийн шат дамжлагаас чөлөөлжээ. Үүнд дугуйн засвар, үсчин, оёдол, кофе шоп, фитнесс зэрэг өдөр тутмын үйлчилгээний бизнесүүд багтаж байна.

Шинэ зохицуулалтын дагуу иргэд www.e-business.mn системээр гар утаснаасаа мэдэгдэл өгч, үйл ажиллагаагаа шууд эхлүүлэх боломжтой болсон байна.

Өөрөөр хэлбэл, бизнес эхлүүлэхийн өмнө төрөөс зөвшөөрөл, дүгнэлт, гэрээ зэрэг бичиг баримт шаардахгүй бөгөөд үйл ажиллагаа эхэлсний дараа холбогдох хяналт, дүгнэлтийг хийж үйлчлэхээр зохицуулжээ.

Ийнхүү бизнес эрхлэх орчныг хөнгөвчилж, иргэдийг шууд үйл ажиллагаагаа эхлүүлэх боломжийг бүрдүүлэх бодлого хэрэгжиж эхэллээ.