-ЦАГДАА НАР МИНИЙ ХҮҮГ СААЖИЛТТАЙ БАЙСАН ХЭМЭЭН ХУУРАМЧ БИЧИГ ГАРГУУЛСАН-

Өнөөдөр Үндэсний мэдээллийн төвд долоон настай хүүгийн амь насыг хөнөөсөн этгээд нэг жилийн хорих ял авсан тухай хохирогчийн ар гэрийнхэн мэдээлэл хийлээ.

Талийгаачийн ээж Н.Оюунцэцэг:

-Би Сэлэнгэ аймгийн Мандал сумын Хэрэх тосгонд 2017 оны зургадугаар сарын 7-нд гарсан хүүгийнхээ ослын тухай ярихаар ирсэн. 2017 оны зургаадугаар сарын 7-ны өдөр миний хүүг М.Мөнхтулга гэгч дайрсан. Ингэхдээ дээгүүр нь дайрч, 50 метр чирч амь насыг нь хохироосон. Энэ хэрэгт мөрдөн байцаагч н.Мөнхсүх хэт удаан шалгаж байна. Энэ хүнээс болж хүүгийн амь нас хохирсон хэрэг хоёр жил шалгагдаж байна. Шинжээчийн дүгнэлтийг цагдаагийн хошууч н.Сүхбаатар гэх хүн хуурамчаар гаргуулсан.

Миний хүүг аймгийн нэгдсэн эмнэлэгт “Тархины усжилтаас үүдэн саажиттай хяналтанд байдаг” гэсэн дүгнэлтийг гаргуулсан байсан. Гэтэл шүүх эмнэлгийн шинжилгээний дүгнэлтээр хүүд маань ямар ч тархины саа өвчин байгаагүй гэдэг нь тогтоогдсон байгаа.

Шинжилгээгээр, “Толгойн гэмтэл баруун талт бөмбөлгийн доторх цус хуралт, няцралт, эрүүний хугарал, хэвлийн зүүн талын ташаа тархмал зулгаралт тогтоогдлоо” гэж байгаа юм. “Дээрх гэмтэл нь доргих үрэгдэх буюу авто ослын үед үүснэ. Мөн шүүх эмнэлгийн шинжилгээгээр үхэлд хүргэх эмгэг өвчин миний хүүд огт байхгүй” нь тогтоогдож гарсан.

Тэгэхэд цагдаа нар хуурамч бичиг гаргаж миний хүүг саажилттай байсан гээд байгаа юм. Үүнээс болж хоёр жил шүүх хурал эцэслэн шийдэгдэхгүй байна. Байцаагч н.Мөнхтулга Эрүүл мэндийн төвийн даргын үүрэг гүйцэтгэгч н.Лхагвадорж гэдэг хүнээс хуурамч бичиг гаргуулж авсан байгаа юм.

-МИНИЙ ХҮҮ ГССҮТ-Д ТАВ ХОНОГ ЯАЖ ЗОВЖ, ТАРЧИЛСАН БОЛ ГЭХЭЭС ЗҮРХ ӨВДӨЖ БАЙНА-

Тухайлбал, Талийгаач долоон настай М нь тархины саажилтын улмаас эмнэлгийн хяналтанд байсан нь үнэн гэсэн бичиг авсан байсан.

Харин Сэлэнгэ аймгийн Мандал сумын Хэрэх тосгоны цэцэрлэгээс 2017 оны долдугаар сарын 20-ны өдөр тодорхойлолт гаргаж өгсөн байгаа юм.

Тэрбээр, "2013-2016 он хүртэл цэцэрлэгт байсан нь үнэн. Хэл ярианы хөгжил дутуу байсан ч бие бялдар оюун ухаан бүрэн бүтэн эрүүл саруул байсан гэсэн тодорхойлолт гаргасан.

М.Мөнхтулга миний хүүг дайраад зогсохгүй хаз тормосоо ялгахгүй дээгүүр нь дайрч чирсэн. Миний хүү ГССҮТ-д бүтэн тав хоног хэвтэхдээ бие нь тэр чигтээ хөх эрээн болж, зулгарч, урагдсан байсан. Хүү минь яаж тэр өдрүүдэд тарчилж үхсэл бол. Одоо ч тэр үеийг бодохоор зүрх өвдөөд байна.

Анх хэргийн газраас дайрсан жолооч зураг авсан гэсэн. Гэтэл тэр нь одоо байхгүй. Нотлох баримт нь алга болсон. Манай тосгоны тэр зам маш чөлөөтэй хаашаа ч дараад явах боломжтой их том зам байтал хүүг минь дайраад алчихсан.

Хүүг минь дайрч алсан хүнийг нэг жилийн хугацаатайгаар тэнсэн харгалзах ял оноож, гурван жил жолоо барих эрхийг нь хассан байхад одоо машин бариад л явж байна.

Сэлэнгэ аймгийн Зүүн хараад шүүх хурал болох гэж байхад хуралд ирээгүй. Учир нь сүрьеэгээр өвдсөн эмнэлгээс гарч болохгүй гэсэн шалтгаан хэлж гурван удаа шүүх хурал хойшилсон. Гэтэл тэр үеэр зах дээр явж байсан. Зураг нь надад бий.

Энэ хугацаанд хэргийг үнэн зөв шийдүүлэхийн тулд яваагүй газар очоогүй хүн гэж байхгүй. Хэргээ шийдүүлэх гээд явж байхад ах н.Мөнх-Эрдэнэ нь над руу мессеж бичсэн. Тэрээр: Чиний хүүхдийг би алсан уу. Би чиний нүдэнд мөнгө шиг харагдаад байна уу гэсэн байсан. Мөн “Үхсэн хүүхдийнхээ ясыг өндөлзүүлээд дэмий л юм байгаа юм даа, хоёр хүүхдэд чинь нөлөөлөх вий дээ” гэж бичсэн.

Тухайн сумандаа хөнгөн гэмт хэрэг гэж үзээд нэг жилийн тэнсэн харгалзах ял оноогоод өнгөрсөн. Энэ хэрэгт маш их гомдолтой байна" гэлээ.

Хэвлэлийн хурлын дараа тэрээр сэтгүүлчдийн асуултанд хариуллаа.

-МАНАЙД САЯ ТӨГРӨГ ӨГЬЕ, ТАНАЙХ ШИГ ЯДАРСАН АЙЛД БОЛНО ГЭСЭН-

-Талийгаач хүү хэдэн настай, ямар зан аршинтай хүү байсан

-Манайх ам бүл тавуулаа, талийгаач хүү минь долоон настай даа амиа алдлаа. Миний хүү сэргэлэн цовоо, хүнд өөрийгөө илэрхийлж чаддаг тийм хүүхэд.

-Тухайн үед юу болсон бэ?

-Манайх Сэлэнгэ аймгийн Мандал сумын Хирх тосгонд байдаг. Тухайн өдөр нөхөр бид хоёр гурван хүүхдээ ээж дээрээ үлдээгээд ажлаар явсан. Гэтэл миний хүүг эгч дүүтэйгээ замаар гарж явахад нь хурд хэтрүүлэн явсан жолооч дунд хүүг минь 50 метр газар чирж давихсан байдаг. Анх хэргийн газраас дайрсан жолооч зураг авсан гэсэн. Гэтэл тэр нь одоо байхгүй. Нотлох баримт нь алга болсон. Манай тосгоны тэр зам маш чөлөөтэй хаашаа ч дараад явах боломжтой их том зам байтал хүүг минь дайраад алчихсан. Тэр үед хүүхдийг минь мөргөчихөөд зогссон бол гар хөлөндөө бэртэл авсан ч өдийд аав ээжийнхээ дэргэд эсэн мэнд амьд сэрүүн байх байлаа.

-Танайх өмгөөлөгчөө яаж авсан бэ?

-Манайх анх нэг өмгөөлөгч аваад эхлээд 800.000 төгрөг төлсөн. Эхний хурлаар өмгөөлж байгаад сүүл рүүгээ алга болсон. Дараа нь бид ахиад нэг өмгөөлөгчид хандахад энэ хэрэг дээр ажиллахгүй гэсэн.

-Нөгөө талаас танай гэр бүлийхэнд туслалцаа хүргэсэн үү?

-Ажил явдлын үеээр хэдэн юм авчирж өгсөн.

-Нөгөө талын өмгөөлөгч тантай уулзсан уу?

-Нөхөр бид хоёртой ирж уулзана гэхэд гэртэй оруулаагүй, харин манай ээжийнд орж уулзсан. “Манайд сая төгрөг өгье, танайх шиг ядарсан айлд болно” ухааны юм ярьсан. Яаж хүний амийг мөнгөөр үнэлж болох юм бэ? Тухайн сумандаа хөнгөн гэмт хэрэг гэж үзээд нэг жилийн тэнсэн харгалзах ял оноогоод өнгөрсөн. Бид энэ хэрэгт маш их гомдолтой байна.

ГЭРЭЛ ЗУРГИЙГ: Г.БАЗАРРАГЧАА