Гэр бүл, хөдөлмөр, нийгмийн хамгааллын сайд Л.Энх-Амгалан мэдээлэл хийж, "Засгийн газрын хуралдаанд Цагаан сар, Үндэсний их баяр наадмаар амрах өдрүүдэд хийх зохицуулалтыг танилцууллаа.

Энэ баярын амралтууд нь амралтын өдөр таарсан тохиолдолд нөхөж амардаг болох зохицуулалт хийхээр танилцуулсан. Мөн битүүний өдрийг амралтын өдөр болгох санал танилцуулсан. Гэхдээ энэ жилийн Цагаан сараар олон хоног амрахаар боллоо гэж ойлгож болохгүй. Үүнийг өөрчлөхийн тулд хуульд өөрчлөлт оруулах шаардлагатай.

Засгийн газар зөвшөөрөл өгсөн тохиолдолд УИХ-д хуулиа өргөн мэдүүлж батлуулснаар энэ зохицуулалт хэрэгжиж эхэлнэ. Хаврын чуулганаар энэ өөрчлөлтийг баталлаа гэхэд наадам, ирэх жилийн Цагаан сараас хэрэгжиж эхэлнэ гэсэн үг.

Нэмээд Засгийн газраас өвлийн ид хүйтний үед иргэдээ амраадаг, зайнаас ажиллуулдаг зохицуулалтыг судлаад танилцуулах үүрэг өгсөн" гэв.