-МАХНЫ ҮНИЙГ 2-3 КОМПАНИ НИЙЛЖ ЗОХИОМЛООР ӨСГӨСӨН АСУУДЛЫГ ТЕГ ШАЛГАНА-

Засгийн газрын Хэрэг эрхлэх газрын дарга Л.Оюун-Эрдэнэ цаг үеийн асуудлаар мэдээлэл хийлээ. Тэрээр "Оюутолгойн гэрээтэй холбоотойгоор 4-5 хүн авлига авсан байж болзошгүй нөхцөл байдал үүссэн юм байна. Ийм мэдээлэл авсан. Одоогоор нэр хэлэх боломжгүй байна. УИХ Оюутолгойтойд шалгалт хийсэн ажлын хэсгийн дүгнэлт, аудитын дүгнэлт, АТГ-аас ирүүлсэн материалуудыг хэлэлцээд Засгийн газар чиглэл өгөх байх. Түүний дараа Засгийн газар хуралдаанд тодорхой шийдвэр гаргана.Тиймээс УИХ яаралтай шалгалтын материалаа хэлэлцэх хэрэгтэй. АТГ-ын дарга асан Х.Энхжаргал Оюутолгойтой холбоотой асуудлаар мэдэгдэл хийсэн шүү дээ. Авлига авсан гэж хардагдаад байгаа хүмүүс бол тухайн үед гэрээ байгуулахдаа зарим аж ахуйн нэгжүүдэд давуу байдал үүсгэсэн байж болзошгүй гэсэн үндэслэлээр шалгагдаж байгаа юм билээ.

Манай Засгийн газрын гишүүн 10 сая ам.долларын хэрэгт холбогдсон тухай мэдээлэл гарсан. Үүний дагуу би зарим хууль хяналтын байгууллагын удирдлагуудаас асуусан. "Одоогоор тогтоогдсон зүйл алга" гэж хэлсэн. Шалгагдаж байгаа асуудал ч байхгүй гэсэн үг. Гэхдээ хэвлэлээр ийм асуудал гарсан учраас цаашдаа шалгагдаад явах байх" гэв.

Үүний дараа сэтгүүлчдийн сонирхсон асуултад хариулав.

Иргэдэд "Итгэлийн зээл" олгохыг танай намынхан дэмжлээ. Энэ хэр бодит ажил хэрэг болж чадах вэ?

-УИХ-ын нэр бүхий гишүүд хуулийн төсөл өргөн бариад Засгийн газарт өгсөн. Ямар арга замаар шийдэх үү гэдгээ Засгийн газар ирэх долоо хоногийн хуралдаанаараа шийднэ. Эдийн засгийн тооцоолол, ямар эх үүсвэрээс гарах вэ гэдгийг нягталж үзэж байгаа.

-Захиргааны Ерөнхий хуулийг баталлаа. Ингэснээр төрийн эрх мэдэл ард түмний гарт байна гэх зарчим алдагдаж, Засгийн газар дураараа авирлах нөхцлийг бүрдүүллээ?

-Нийгэмд эмзэглэл байгааг ойлгож байна. Нэг хэсэг хувийн хэвшил хэт туйлширч Захиргааны хэргийн шүүхээ даваад төрөө хэт сул болгосон асуудал байсан. Үүнийг цэгцлэхийн тулд энэ хуулийг гаргахаар өөр арга байгаагүй. Гэхдээ миний харагдаж байгаагаар энэ хуулинд хориг тавигдаж магадгүй нөхцөл байдал байгаа юм билээ.

-Махны үнийн зохицуулалт хийгдэх үү?

-Энэ долоо хоногийн Засгийн газрын ээлжит бус хурлаар хэлэлцэнэ. ХХААХҮ-ийн сайд Ч.Улаан асуудлаа оруулна. Үнэ өссөн асуудлаар судалж, шалгаж байгаа. Зохиомол өсөлт үү, зах зээлийн дагуу өссөн үү гэдгийг тайлбарлах байх. Махны үнийг 2-3 компани нийлж өсгөн, зохиомол хомсдол үүсгэсэн байж болзошгүй гэсэн мэдээлэл ирсэн. Тиймээс ТЕГ шалгаж байгаа. Ч.Улаан сайд нөөцийн махыг гаргах тал дээр анхаарч ажиллаж байгаа.

-“Эрдэнэт”-ийн 49 хувийн асуудал ямар шатанд байна вэ?

-“Эрдэнэт”-ийн 49 хувьтай холбоотой асуудлаар Засгийн газар шалган тогтоох боломжгүй. ЦЕГ-т эрүүгийн хэрэг үүсгэсэн.