Монгол Улсын төрийн дээд “Чингис хаан” тэргүүн зэргийн одонг олон улсад таниулах, түүхэн ач холбогдлыг нь алдаршуулан сурталчлах зорилготой цахим хуудсыг Монгол Улсын Ерөнхийлөгчийн Тамгын газраас нээлээ.

Их эзэн Чингис хааны мэндэлсэн Монгол бахархлын өдрийг тохиолдуулан нээж буй “Монгол Улсын төрийн дээд “Чингис хаан” тэргүүн зэргийн одон” цахим хуудас нь англи хэлээр мэдээлэл түгээх юм. Тус хуудас нь дэлхийн агуу удирдагч Чингис хааны түүх цадиг, Монголын эзэнт гүрний болон дэлхийн түүхэнд оруулсан үнэт зүйлс, дэлхийн хямрал сөргөлдөөнийг шийдвэрлэхэд өнөө ч үнэ цэнтэй хэвээр байгаа “Pax Mongolica” буюу Монголын их амар амгалан, энх тайванч бодлогын тухай зэрэг өргөн мэдээллийн эх сурвалж юм.

Цахим хуудас дараах үндсэн 6 цэсээс бүрдэнэ. Үүнд, дэлхийн мянганы их хүнээр тодорсон Тэмүжин Чингис хааны амьдрал, үйл хэрэг, дэлхий түүхэнд үзүүлсэн нөлөө, ач холбогдол,

-Pax Mongolica буюу Монголын эзэнт гүрний энх тайванч бодлого, олон улсын худалдаа, соёлын солилцоо, дипломат харилцаанд оруулсан шинэчлэл,

-Монгол Улсын төрийн дээд шагнал “Чингис хаан” тэргүүн зэргийн одонг хүртээх үндсэн шалгуур, нэр дэвшүүлэх үйл явц.

-Одонгийн загвар, утга бэлгэдэл, онцлог,

-Чингис хаан” одон хүртсэн хувь хүн, байгууллага, уран бүтээлчид, хамтлагийн талаарх дэлгэрэнгүй мэдээлэл, тэдний амжилт, үйл хэрэг,

-Чингис хаан, шагнал гардуулах ёслол, шагнал хүртсэн эрхмүүдийн түүхэн гэрэл зургийн цомог болон видео бичлэгүүд гэсэн үндсэн цэстэй аж.

Энэхүү цахим хуудас нь Их эзэн Чингис хаан, түүний үйл хэрэг төдийгүй XIII-XIV зууны дэлхийн түүх, хүн төрөлхтний хөгжил дэвшилд монголчуудын гүйцэтгэсэн үүрэг, хувь нэмрийг тодотгон даян дэлхийд сурталчлан таниулж, түгээн дэлгэрүүлэх чухал эх сурвалж болох ач холбогдолтой. Тус цахим хуудсаар зочлох бол Https://chinggiskhaanaward.org холбоосоор орж үзэх боломжтой.