Монгол Улсын Ерөнхийлөгч У.Хүрэлсүх Азербайжан Улсад зохион байгуулагдаж буй, Нэгдсэн үндэстний байгууллага (НҮБ)-ын Уур амьсгалын өөрчлөлтийн тухай конвенцийн Талуудын 29 дүгээр бага хурал (COP29)-д оролцож байна.

Ерөнхийлөгчийн Гадаад бодлогын зөвлөх Э.Одбаярын мэдээлснээр, COP 29 бага хурлын үеэр Азербайжаны Ерөнхийлөгч Илхам Алиев Монгол Улсад ойрын хугацаанд айлчлах хүсэлтээ байгаа илэрхийлжээ.

Үүнтэй холбогдуулан тус улсын дэд сайдаар ахлуулсан Гадаад харилцааны яамны төлөөлөгчид, уул уурхай, эрчим хүч, зам тээвэр, боловсролболон хувийн хэвшлийнхний төлөөлөл бүхий баг Монголд ирж, айлчлалын бэлтгэл ажлыг хангах талаар хоёр тал тохирсон байна.

Эх сурвалжийн мэдээлж буйгаар, Монгол Улсын Ерөнхийлөгч Азербайжаны Ерөнхийлөгчийн айлчлалыг ирэх оны ажлын төлөвлөгөөндөө багтаажээ.

Мөн хоёр улсын Ерөнхийлөгч олон салбарт харилцан ашигтай, хамтын ажиллагаа өрнөх боломжтойд санал нэгдэж, ярилцаж тохиролцсон байна.

Азербайжаны тал Монгол Улсын бараа, бүтээгдэхүүнийг худалдан аваад зогсохгүй Каспийн тэнгис дэх боомтуудаараа дамжуулан тээвэрлэх боломжтойгоо илэрхийлжээ.