АНУ-ын 39 дэх ерөнхийлөгч Жимми Картер 100 насандаа таалал төгсчээ
АНУ-ын 39 дэх ерөнхийлөгч Жимми Картер 100 насандаа Жоржиа муж улсын Плэйнс дэх гэртээ таалал төгссөн талаар Картер төвөөс ням гарагт хийсэн мэдэгдэлдээ дурджээ.
Талийгаачийн хүү түүний талаар хэлэхдээ “Зөвхөн миний төдийгүй энх тайван, хүний эрх, өгөөмөр хайранд итгэдэг хүн бүрийн хувьд баатар байсан” хэмээн тодорхойлсон байна.
АНУ-ын Ерөнхийлөгч Жо Байден түүнийг "хайртай найз" гэж дурдаад, "Ж.Картер бол зарчимч, үнэнч шударга, даруу төлөв зантай хүн. Тэр утга учиртай, зорилготой амьдрахын үлгэр дуурайлал болсон хүн байлаа” гэж хэлжээ.
Америкийн Ерөнхийлөгчөөр сонгогдсон Ерөнхийлөгч Дональд Трамп америкчууд Ж.Картерт “талархаж явах өртэй” гэж мэдэгдсэн байна. Ерөнхийлөгч асан Билл Клинтон "Ж.Картер “бусдын төлөө хүчин зүтгэхийн тулд амьдарсан” гэж хэлсэн байна.
Ж.Картер 1977-1981 оны хооронд АНУ-ын 39 дэх Ерөнхийлөгчөөр ажилласан бөгөөд АНУ-ын түүхэнд хамгийн урт насалсан ерөнхийлөгч юм. Өнгөрсөн оноос эхлэн тэрбээр элэг, тархинд нь тархсан меланома өвчний улмаас гэртээ хөнгөвчлөх эмчилгээ хийлгэж байжээ.
Ж.Картер бүрэн эрхийн хугацаагаа дуусгасны дараа хамгийн урт удаан амьдарсан АНУ-ын Ерөнхийлөгч болж түүхэнд тэмдэглэгдэв. Түүний төрийн тэргүүнээр ажиллаж байсан үеийг Ойрхи Дорнодод болсон түүхэн үйл явдлуудтай холбон дурсдаг.
Тэрбээр Египет, Израилын хооронд 1979 онд найрамдлын түүхэн гэрээ байгуулахад гол үүрэг гүйцэтгэсэн 1978 оны Кэмп-Дэвидийн хэлэлцээрт зуучилсан юм.
Картер 1979 оны Исламын хувьсгалын дараа 444 хоногийн турш барьцаалагдсан Техран дахь АНУ-ын Элчин сайдын яамны 52 ажилтныг суллахаар хэлэлцээ хийх үед Ерөнхийлөгчөөр ажиллаж байв.
1980 онд АНУ-ын ерөнхийлөгчийн сонгуулийн кампанит ажил ид өрнөж байх үед барьцаалагдсан хүмүүсийг аврах ажиллагаа дөрөвдүгээр сард бүтэлгүйтэж, найман америк иргэн амиа алджээ.
Энэ нь түүнийг Рональд Рейганд ялагдах гол шалтгаан болсон гэж үздэг. Барьцаалагдсан хүмүүсийг 1981 онд Р.Рейган тангараг өргөснөөс хойш хэдхэн минутын дараа суллаж байсан аж.
Ерөнхийлөгчийн сонгуульд ялагдсаныхаа дараа Ж.Картер олон улсад энхийг сахиулах, ардчилал, нийгмийн эрүүл мэнд, хүний эрхийг хамгаалахад чиглэсэн үйл ажиллагаа явуулдаг Картерын нэрэмжит төвийг 1982 онд байгуулжээ.
Эх сурвалж: CNN, BBC
Б:ЖАРГАЛ
Сэтгэгдэл
Зочин [66.181.191.163] 2024-12-31 11:17:01
Ум ма ни бад мэ хум