Л.Оюун-Эрдэнэ нарын гишүүд УИХ-ын даргыг чөлөөлөх тогтоолын төслийг өнөөдөр өргөн барилаа. Үүнтэй холбогдуулан УИХ-ын дарга М.Энхболд мэдээлэл хийлээ.

Тэрбээр “УИХ-ын даргыг чөлөөлөхтэй холбогдуулан Монгол Улсын Ерөнхийлөгчөөс өргөн мэдүүлсэн УИХ-ын Дэгийн тухай хуульд өөрчлөлт оруулах, УИХ-ын тухай хуульд нэмэлт, өөрчлөлт оруулах хууль УИХ-аар шийдэгдэж өнөөдрөөс хэрэгжиж эхэллээ. 20 минутын өмнө УИХ-ын нэр бүхий гишүүд УИХ-ын гишүүдийн гарын үсэгтэй УИХ-ын даргыг ажлаас нь чөлөөлөх хүсэлт тавьсан тогтоолын төслийг надад өргөн барилаа. Энэ асуудлыг яаралтай горимоор хэлэлцэх хуулийн дэгтэй. УИХ-ын даргын зөвлөл хуралдаж байж яаралтай горимоор хэлэлцэх эсэхээр журамд өөрчлөт оруулах захирамж гаргадаг. Өнөөдөр 13.00 цагт УИХ-ын даргын зөвлөл хуралдаж уг хуулийн төслийг хэрхэн хэлэлцэх асуудлаар эцсийн шийдвэрийг гаргана. Энэ асуудлыг өргөн барихтай холбогдуулж би Төрийн байгуулалтын байнгын хорооны даргатай санал солилцсон. Өнөөдрөөс хойш хамгийн ойр чуулган хийх боломжтой өдөр нь ирэх долоо хоногийн мягмар гариг юм байна. Энэ өдөр 09.00 цагт Төрийн байгуулалтын байнгын хороо, 10.00 цагт УИХ-ын чуулганыг хуралдуулж УИХ-ын даргыг чөлөөлөх асуудлыг хэлэлцэх саналтай байгаа талаар бид ярилцсан.

Уг асуудлыг энэ сарын 29-нд хэлэлцэхээр болсон нь учиртай. Хэдийгээр хууль өнөөдрөөс хэрэгжиж эхэлж буй ч Дэгийн тухай хуульд заасны дагуу Төрийн мэдээлэл сэтгүүлд хэвлэгдсэнийн дараагаас хуулийг хэрэглэнэ гэсэн заалттай. Тиймээс УИХ-аас гарсан шийдвэрүүдийг уг сэтгүүлд хэвлэдэг. Төрийн мэдээлэл сэтгүүлийн эхийг дөрөв дэхь өдөр хэвлэлд шилжүүлсэн. Даваа гаригт хэвлэгдэн гарна. Тиймээс УИХ-ын даргыг чөлөөлөх хуулийг хэрэглэх хугацаа 28-ны өдрөөс эхэлж байна. Уг асуудал энэ долоо хоногийн УИХ-ын чуулганы хуралдаанаар хэлэлцэх асуудлын жагсаалтад ороогүй, дөнгөж сая өргөн барьсан. Энэ долоо хоногт шууд хэлэлцвэл Дэгийн хууль зөрчинө. Тиймээс хуулийн дагуу уг асуудлыг энэ сарын 29-ны өдөр хэлэлцэх саналтай байна. Би ажил, албан тушаалтай зууралдаагүй. Гагцхүү хуулийн дагуу хуульд заасан үндэслэлээр албан тушаалаа хүлээлгэн өгөх саналтай байсан. Тиймээс уг асуудлыг хуулийн дагуу хэлэлцэн шийдвэрлэж Цагаан сарын өмнө шинэ УИХ-ын дарга томилогдож төрийн гурван өндөрлөг олон түмэнтэйгээ золгож мэндээ мэдэлцэх нь зөв байх. Тиймээс ирэх долоо хоногийн пүрэв гаригийн хуралдааныг хоёр хоногоор наашуулж мягмар гаригт хуралдуулах захирамж гаргана гэж бодож байна” гэлээ.

УИХ-ын гишүүн Т.Аюурсайхан, Л.Оюун-Эрдэнэ, Л.Болд, Ж.Батзандан, Х.Нямбаатар нарын гишүүд УИХ-ын дарга М.Энхболдыг “Монгол Улсын Их Хурлын дарга Миеэгомбын Энхболдыг үүрэгт ажлаас нь чөлөөлөх тухай” тогтоолын төслийг өргөн мэдүүллээ. Тогтоолын төслийг өргөн мэдүүлснийхээ дараа сэтгүүлчдэд мэдээлэл хийсэн юм.

Мэдээллийн үеэр УИХ-ын гишүүн Л.Оюун-Эрдэнэ “УИХ-ын нэр бүхий 39 гишүүн УИХ-ын дарга М.Энхболдыг чөлөөлөх тогтоолын төслийг өргөн барилаа. Хуулийн төслийг нэн яаралтай дэгээр хэлэлцэхээр баталсан. Тиймээс бид өнөөдөр чуулганы нэгдсэн хуралдаанаар хэлэлцэх хүсэлт гаргасан ч УИХ-ын дарга М.Энхболд ирэх долоо хоногийн мягмар гаригт байнгын хороогор хэлэлцэнэ гэж хэллээ.

Нийгмийн шаардлага байгаа учраас бид одоо чуулганы хуралдаан руу орж, яаралтайгаар өнөөдөр хэлэлцэх,УИХ-ын даргын зөвлөл хуралдах горимын саналыг гаргасан. Хуулийн төслийг хэлэлцэх хугацааг хойшлуулах үйлдэл хийвэл дахин бойкот зарлахаас өөр аргагүй байдал үүснэ” гэсэн юм.

ТОГТООЛЫН ТӨСӨЛД “Монгол Улсын Үндсэн хуулийн хорин зургадугаар зүйлийн нэг дэх хэсэг, Монгол Улсын Улсын Их Хурлын тухай хуулийн 7 дугаар зүйлийн 7.1.3, 10 дугаар зүйлийн 10.2.6-д заасан бүрэн эрхийнхээ хүрээнд “Монгол Улсын Их Хурлын дарга Миеэгомбын Энхболдыг үүрэгт ажлаас нь чөлөөлөх тухай” тогтоолын төслийг өргөн мэдүүлж байна” гэж дурджээ.

Г.ИТГЭЛ

Парламент дахь гишүүдийн дийлэнх олонхын саналаар УИХ-ын даргыг чөлөөлдөг болох хууль эрхзүйн орчин өнөөдрөөс бүрдэж буй. Уг хуулийн өөрчлөлт хэрэгжиж эхэлсэнтэй холбогдуулан, өнөөдөр 09:00 цагаас УИХ-ын дарга М.Энхболдыг албан үүргээс нь чөлөөлөх тогтоолын төслийг өргөн барина гэдгээ Л.Оюун-Эрдэнэ гишүүн мэдэгдсэн.

ТОГТООЛЫН ТӨСӨЛД “Монгол Улсын Үндсэн хуулийн хорин зургадугаар зүйлийн нэг дэх хэсэг, Монгол Улсын Улсын Их Хурлын тухай хуулийн 7 дугаар зүйлийн 7.1.3, 10 дугаар зүйлийн 10.2.6-д заасан бүрэн эрхийнхээ хүрээнд “Монгол Улсын Их Хурлын дарга Миеэгомбын Энхболдыг үүрэгт ажлаас нь чөлөөлөх тухай” тогтоолын төслийг өргөн мэдүүлж байна” гэж дурджээ.

Тогтоолын төсөлд гарын үсэг зурсан гишүүдийн нэрийг танилцуулж байна.

1. Л.Оюун-Эрдэнэ
2. Т.Аюурсайхан
3. Г.Занданшатар
4. Н.Энхболд
5. Ц.Нямдорж
6. Н.Цэрэнбат
7. Г.Цогтбаатар
8. С.Чинзориг
9. Ч.Хүрэлбаатар
10. Х.Баделхан
11. Ч.Улаан
12. Я.Содбаатар
13. Ц.Даваасүрэн
14. Б.Сарангэрэл
15. Ө.Энхтүвшин
16. Д.Сумъяабазар
17. Х.Нямбаатар
18. М.Оюунчимэг
19. Г.Солтан
20. А.Сүхбат
21. Д.Тогтохсүрэн
22. Ж.Энхбаяр
23. Ц.Гарамжав
24. Б.Энх-Амгалан
25. Д.Дамба-Очир
26. Л.Элдэв-Очир
27. Б.Бат-Эрдэнэ
28. Б.Жавхлан
29. Б.Батзориг
30. Н.Учрал
31. Ж.Ганбаатар
32. С.Батболд
33. Л.Энхболд
34. Х.Болорчулуун
35. С.Жавхлан
36. Ж.Батзандан
37. Л.Болд
38. Я.Санжмятав
39. Д.Мурат

Ж.МЯДАГБАДАМ