Хаврын чуулганаар УИХ-ын гишүүн М.Оюунчимэг, Н.Оюундарь Х.Нямбаатар, Ж.Энхбаяр, Х.Болорчулуун нарын бүрэн эрхийг түдгэлзүүлэх хүсэлтийг прокуророос УИХ-д хүргүүлж, хэлэлцүүлнэ гэх мэдээлэл гарсан. Бид дээрх гишүүдээс уг асуудлаар тайлбар сонслоо.

Ж.ЭНХБАЯР: ШААРДЛАГАТАЙ БОЛ БҮРЭН ЭРХЭЭСЭЭ ТАТГАЛЗААД ШАЛГУУЛАХАД БЭЛЭН

УИХ-ын гишүүн Ж.Энхбаярын хувьд гадаадад томилолттой явж байгаа аж. Гэхдээ тэрбээр өмнө нь уг асуудлаар маш тодорхой байр сууриа илэрхийлж байсныг сануулья.

Тэрбээр “Миний хувьцаа эзэмшдэг хөдөө аж ахуйн чиглэлийн компани мэргэжлийн яамныхаа зарласан хөтөлбөрт төсөл бичээд барьцаа хөрөнгөө тавиад, төсөл шалгаруулалтын гурван шалгуурыг даваад зээлээ авсан. Гэхдээ энэ улс төр болж хувирч байгаа учраас Хас банкнаас зээл аваад төлсөн. Монголынхоо ард түмнээс уучлал гуйсан.

Би өөртөө үнэхээр итгэлтэй байна. Улс төрд ороод 18 жил болж байна. Энэ хугацаанд тендер авч үзсэнгүй, улсын үйлдвэрийн газар бараа шахдаг, концесс авдаг олон зүйл бий. Би үүнд оролцдоггүй. Анх удаа миний хувьцаа эзэмшдэг компани ЖДҮХС-аас зээл авсан. Тиймээс шаардлагатай бол бүрэн эрхээсээ татгалзаад шалгуулахад бэлэн байна” гэсэн.

Түүний хувьд үхрийн аж, ахуй эрхлэх ажлын хүрээнд ЖДҮХС-аас зээл авсан гэгддэг ч зээлсэн мөнгөө мөн ББСБ-аар дамжуулан өндөр хүүтэйгээр хүүлсэн байх магадлалтай гэх мэдээлэл бий.

Х.БОЛОРЧУЛУУН: БҮРЭН ЭРХЭЭС МИНЬ ТҮДГЭЛЗҮҮЛЭХИЙГ ХҮССЭН ХҮМҮҮС Л ИЙМ ЮМ БИЧЭЭД, ЯРИАД ЯВЖ БАЙГАА БИЗ

УИХ-ын гишүүн Х.Болорчулууны хувьд “Юу гэж тийм юм байдаг юм. Прокуророос ямар нэгэн мэдээлэл сонсоогүй байна. Бүрэн эрхээс минь түдгэлзүүлэхийг хүссэн хүмүүс л тийм мэдээлэл бичээд, яриад явж байгаа биз дээ. Өөр юу байв гэж” гэх тайлбарыг хэлсэн юм.

Тэрбээр өөрийн эзэмшлийн “Дорнод Гурил” компанидаа ЖДҮХС-аас 950 сая төгрөгийн зээл авсан.

Н.ОЮУНДАРЬ: БИ ТИЙМ ЗҮЙЛ СОНСООГҮЙ БАЙНА

Би тийм зүйл сонсоогүй л байна. Өнөөдөр /өчигдөр/ зарим хэвлэлээс л ийм мэдээлэл авлаа гэх тайлбарыг өглөө.

Н.Оюундарь гишүүний хүү С.Бат-Ерөөл Сэлэнгэ аймагт фермерийн аж ахуй эрхлэх төслөөр “Ред Стар клуб” ХХК-иараа зээл авсан. Гэсэн ч гишүүн 2017 оны Хөрөнгө орлогын мэдүүлэгтээ хүүгийнхээ хэмээн тайлбарлаж буй "Рэд стар клуб" ХХК-ийн 80 хувийг эзэмшдэг болохоо мэдүүлсэн байдаг. Гэхдээ Н.Оюундарь гишүүнийг ЖДҮХС-аас зээлсэн мөнгөө ББСБ-аар дамжуулан угаасан байж болзошгүй гэх хардлага байгаа юм. С.Бат-Ерөөл 2018 оны 11 дүгээр сарын 6-ны өдөр зээлээ эргүүлэн төлсөн байна.

М.ОЮУНЧИМЭГ: ДАНСААР ОРЖ, ГАРСАН МӨНГӨ БАЙХГҮЙ

Харин М.Оюунчимэг гишүүн “Би худал мэдээллийг бичсэн газрыг шүүхэд өгнө. Миний хөрөнгө орлогын мэдүүлэгт бичигдсэн ганцхан компани бий. Гэхдээ би өөрөө бизнес эрхэлдэггүй. Манай нөхөр ОХУ-д сургууль төгсөж ирээд л бизнес хийж эхэлсэн. Унаж, босч яваа бизнесмэн. Капитал банкнаас 24 хувийн хүүтэй зээл авч бизнес нь бүтэлгүйтэж шүүхэд хүртэл дуудагдаад л явж байгаа. Миний хөрөнгө орлогын мэдүүлэгт дурдагдсан компани ЖДҮХС-аас зээл аваагүй. Дансаар мөнгө орсон зүйл байхгүй. Миний нэр төрд халдаж гүтгэж байна. Чанга дуугарч, шаардлага тавьж байгаа учраас намайг гүтгээд байна. Манай нөхрийн дансны хуулгыг хуулбарлаж тавьсан байсан. Хувь хүний мэдээллийг олон нийтэд гаргасан банкийг бас шалгуулна. Би жижиг, дунд, үйлдвэрлэл эрхлэгчдийг дэмжиж өгөхийг хүсч холбогдох албан тушаалтнуудтай нь холбож ажиллаж байсан. Цагдаа, шүүхээр шалгуулна” гэлээ.

УИХ-ын гишүүн М.Оюунчимэгийн хувьд нэр бүхий аж, ахуй нэгжид ЖДҮХС-гаас зээл авахад нь туслалцаа үзүүлсэн. Үүнийхээ хариуд зээлийнхээ 120 сая төгрөгийг бэлэглэлийн гэрээгээр нөхрийнхөө дансаар дамжуулан авсан гэх мэдээллийг УИХ-ын зарим гишүүд ярьсан.

Харин Х.Нямбаатар гишүүний хувьд бидэнтэй холбогдохоос татгалзсан юм. Түүний хувьд ЖДҮХС-гаас өөрийн хамаарал бүхий ААН-д зээл аваагүй ч хоёр ч зээл дээр өөрийн нэр дээрх хөрөнгийг барьцаалсан гэх баримт сөхөгдсөн билээ.

ЖДҮХС-аас өөрийн хамаарал бүхий этгээд, аж, ахуй нэгж, компанид зээл авсан УИХ-ын гишүүн Б.Батзориг, Б.Ундармаа, Л.Энхболд, Г.Солтан, Д.Дамба-Очир нарын яллах дүгнэлтийг үйлдэж шүүхэд шилжүүлсэн.

Улсын ерөнхий прокуророос дээрх таван гишүүний бүрэн эрхийг түдгэлзүүлэх хүсэлтийг УИХ-д хүргүүлж, хэлэлцүүлсэн ч хүлээж аваагүй. Прокуророос тэднийг хэргийн мөрдөн байцаалтад саад учруулж буй талаар мэдээлж байсан.

Дээрх таван гишүүний бүрэн эрхийг түдгэлзүүлэх болсон прокурорын үндэслэлийг ЭНД дарж уншина уу.

ХАВРЫН ЧУУЛГАНААР ТАВАН ГИШҮҮНИЙ БҮРЭН ЭРХИЙГ ТҮДГЭЛЗҮҮЛЭХ АСУУДЛЫГ ХЭЛЭЛЦЭНЭ

Тэгвэл хаврын чуулганаар дахин таван гишүүний бүрэн эрхийг түдгэлзүүлэх асуудлыг Улсын ерөнхий прокуророос УИХ-д оруулж ирэхээр бэлтгэж байгаа гэх мэдээлэл байна.

Энэ талаар УИХ-ын гишүүн О.Баасанхүү өнгөрсөн долоо хоногт мэдээлэл хийж “Яллагдагчаар татагдсан таван гишүүний асуудал шүүх рүү шилжсэн. Өөр таван гишүүний асуудал орж ирнэ. ЖДҮХС-аас зээл авсан нийт 23 гишүүний асуудал бий. Тав, таваар нь асуудлыг нь ярина. Нэг эмэгтэй гишүүн бэлэглэлийн гэрээгээр 120 сая төгрөг авсан. Надад 120 сая төгрөг бэлэглэсэн гээд гарын үсэг зурчих гээд. Мөн нэг эрэгтэй гишүүн АТГ-ын мөрдөн байцаагчийг ална, тална гэж сүрдүүлсэн гээд шившгийн хүмүүсийн асуудал орж ирнэ” гэсэн юм.

О.Баасанхүү гишүүнээс өмнө Ерөнхий прокурор М.Энх-Амгалан “Удахгүй дараачийн гишүүдийн нэрийг УИХ- руу оруулж ирнэ. Нэр бүхий гишүүн мэдүүлэг өгөхөөр очихдоо мөрдөн байцаагчийг шууд байдлаар заналхийлсэн. Энэ хүний асуудлыг ч хөндөнө” гэсэн билээ.

Тэгвэл хаврын чуулганаар чухам хэн, хэний бүрэн эрхийг түдгэлзүүлэх асуудлыг хөндөх вэ гэдэг асуулт олны анхаарлыг татаж байна.

Эх сурвалжийн мэдээлж буйгаар УИХ-ын гишүүн М.Оюунчимэг, Н.Оюундарь Х.Нямбаатар, Ж.Энхбаяр, Х.Болорчулуун нарыг бүрэн эрхээс нь түдгэлзүүлэх асуудлыг Улсын ерөнхий прокуророос УИХ-д ирүүлж магадгүй НӨХЦӨЛ БАЙДАЛ ҮҮСЧЭЭ.

ХЭН, ЯМАР ҮНДЭСЛЭЛЭЭР БУРУУТГАГДАВ

УИХ-ын гишүүн М.Оюунчимэгийн хувьд нэр бүхий аж, ахуй нэгжид ЖДҮХС-гаас зээл авахад нь туслалцаа үзүүлсэн. Үүнийхээ хариуд зээлийнхээ 120 сая төгрөгийг бэлэглэлийн гэрээгээр нөхрийнхөө дансаар дамжуулан авсан гэх мэдээлэл бий.

Харин УИХ-ын гишүүн Х.Нямбаатар ЖДҮХС-аас зээл авсан хоёр ч аж, ахуй нэгжид өөрийн нэр дээрх орон сууцыг барьцаа хэлбэрээр олгосон гэх баримт бий. Гэхдээ тэрбээр өөрийн болон хамаарал бүхий этгээдийнхээ нэр дээр зээл аваагүй юм.

Харин Х.Болорчулуун гишүүн өөрийн эзэмшлийн “Дорнод Гурил” компанидаа 950 сая төгрөгийн зээл авсан.

Н.Оюундарь гишүүний хүү С.Бат-Ерөөл Сэлэнгэ аймагт фермерийн аж ахуй эрхлэх төслөөр “Ред Стар клуб” ХХК-иараа зээл авсан. Гэсэн ч гишүүн 2017 оны Хөрөнгө орлогын мэдүүлэгтээ хүүгийнхээ хэмээн тайлбарлаж буй "Рэд стар клуб" ХХК-ийн 80 хувийг эзэмшдэг болохоо мэдүүлсэн байдаг. Гэхдээ Н.Оюундарь гишүүнийг ЖДҮХС-аас зээлсэн мөнгөө ББСБ-аар дамжуулан угаасан байж болзошгүй гэх хардлага байгаа юм. С.Бат-Ерөөл 2018 оны 11 дүгээр сарын 6-ны өдөр зээлээ эргүүлэн төлсөн байна.

Харин УИХ-ын гишүүж Ж.Энхбаярын хувьд үхрийн аж, ахуй эрхлэх ажлын хүрээнд ЖДҮХС-аас зээл авсан гэгддэг ч зээлсэн мөнгөө мөн ББСБ-аар дамжуулан өндөр хүүтэйгээр хүүлсэн байх магадлалтай гэх мэдээлэл байгаа.

Түүнийг түдгэлзүүлэх асуудлыг Б.Батзориг, Б.Ундармаа, Л.Энхболд, Г.Солтан, Д.Дамба-Очир нартай хамт оруулж ирэх мэдээлэл байсан ч хуулийнхантай тохироо хийсний үндсэн дээр хойшлуулсан гэх мэдээлэл байдаг. Тухайн үед Ж.Энхбаяр гишүүн өөрөө гишүүний бүрэн эрхээсээ түдгэлзэж шалгуулна гэж ярьж байсан билээ.